Tuesday, June 26, 2007

بنحبك يا بابا يا مظبطنا

ياشعبى ياحبيبى ياحاطك في جيبي يابن الحلال
ياشعبي ياشاطر ياجابر خواطر ياساكن مقابر وصابر وعال

ياواكل سمومك يابايع هدومك ياحامل همومك وشايل جبال


ياشعبي اللي نايم وسارح وهايم وفي الفقر عايم وحاله ده حال


احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشي امورك كده باتكال

واحب اللي ينصب واحب اللي يكدب واحب اللي ينهب ويسرق تلال

واحب اللي شايف وعارف وخايف وبالع لسانه وكاتم ماقال


واحب اللي قافل عيونه المغفل واحب ******* واحب البغال



واحب اللي راضي واحب اللي فاضي واحب اللي عايز يربي العيال

واحب اللي يائس واحب اللي بائس واحب اللي محبط وشايف محال


واحبك تسافر وتبعد تهاجر وتبعت فلوسك دولار او ريال


واحبك تطبل تهلل تهبل عشان مطش كوره وفيلم ومقال
واحبك تأيد تعضض تمجد توافق تنافق وتلحس نعال

تحضر نشادر تجمع كوادر تلمع تقمع تظبط مجال



لكن لو تفكر تخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال



وعايز تنور وعايز تطور وتعمللي روحك مفرد رجل
ساعتها حجيبك لايمكن اسيبك وراح تبقى عبره وتصبح مثال




حبهدل جنابك واذل اللي جابك وحيكون عذابك ده فوق الاحتمال
وامرمط سعادتك واهزأ سيادتك واخلي كرامتك في حالة هزال




وتلبس قضيه وتصبح رزيه وباقي حياتك تعيش في انعزال


حتقبل ححبك حترفض حلبك حتطلع حتنزل حجيبلك جمااااال

13 comments:

sharkawoo said...

القصيدة دي قرأتها قبل كدا... جامدة طحن ... بس مع صور ليها بعد تاني ...

كمل يا ريس كمل :)

عمرو المصري said...

القصيدة جامدة جدا
بس انت بتحب كل العالم دي
ومجبتش سيرة العالم اللي بتحارب عشان تحرر البلد دي يعني ماهك يستاهلوا الحب برضه علي افتراض انهم من الشعب

تحياتي من ارض الحرب

FloNa said...

والله اعدة بدحك وانا من جوة بعيط


فعلا بالضبط زي ما القصيدة بتقول


لا حول ولا قوة الا بالله بجد

Anonymous said...

بجد جامده جدا
و المدونه كلها اكتر من رائعه
استمروا

me said...

القصيدة دي أنا بحبها جداً
وفعلاً
هم يضحط وهم يبكي
بوست رائع ومميز بالصور

Anonymous said...

جميلة المدونة
ده اول زيارة ليا و ان شاء الله مش الاخيرة

جميلة اوي القصيدة ده

وك فيك يا مصر من المضحكات و لكنه ضحك كالبكاء

أجمل حاجة الصور مع الكلام

mo'men mohamed said...

رخوالله أخى وانا بنقرا بقيت مش عارف أضحك ولا أصرخ
هم يبكى وهم يضحك
السلام عليكم

Alaa said...

جميلة القصيدة دي جدا يا محمد
و كمان مدعمة بالصور
بقت أجمل
تحياتي :)

Monzer said...

هو الى مبهدلنا ...هو
هو الى مشحططنا ...هو
هو الى معذبنا ... هو
حسنى يا حسنى
ههههههههههه
والله احنا شعب يستاهل الضرب
ده انا لو بقيت ريس عليكم
وحد كتب فيه كده، ده أنا أجرى وراكم واحد واحد
بس لو بقيت زيه، ابقوا انتم اجروا ورايا بأه :)
سلام يا معلم

Anonymous said...

جميلة اوي القصيدة مع الصور

جزاك الله خير اخ محمد

حسيت انها بتعبر عن شعور كل مواطن

حاسس بالبيحصل حواليه

Alaa said...

محمد أنا محتاج رأيك بخصوص الموضوع ده

تجمع مدوني مصر .. حقيقة قابلة للتنفيذ أم حلم بعيد عن الواقع

Nermien Hani said...

اول ما شفتها افتكرت خطاب اللي كاتبها عشان من يومين بعتهاله كانت واحدة صاحبتي بعتهالي بس لما شفت اسمك محمد قلت في نفسي يااااااااااه دي الحاجة بتنتشر بسرعة اوي عالنت

حلوة يا محمد مع الصور روعة

كش ملك said...

جزاكم الله خير على تعليقاتكم