ياشعبى ياحبيبى ياحاطك في جيبي يابن الحلال
ياشعبي ياشاطر ياجابر خواطر ياساكن مقابر وصابر وعال
ياواكل سمومك يابايع هدومك ياحامل همومك وشايل جبال
ياشعبي ياشاطر ياجابر خواطر ياساكن مقابر وصابر وعال
ياواكل سمومك يابايع هدومك ياحامل همومك وشايل جبال
ياشعبي اللي نايم وسارح وهايم وفي الفقر عايم وحاله ده حال
احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشي امورك كده باتكال
واحب اللي ينصب واحب اللي يكدب واحب اللي ينهب ويسرق تلال 
واحب اللي شايف وعارف وخايف وبالع لسانه وكاتم ماقال
واحب اللي قافل عيونه المغفل واحب ******* واحب البغال
واحب اللي راضي واحب اللي فاضي واحب اللي عايز يربي العيال
واحب اللي يائس واحب اللي بائس واحب اللي محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان مطش كوره وفيلم ومقال
واحبك تأيد تعضض تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
واحبك تأيد تعضض تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللي روحك مفرد رجل
ساعتها حجيبك لايمكن اسيبك وراح تبقى عبره وتصبح مثال
ساعتها حجيبك لايمكن اسيبك وراح تبقى عبره وتصبح مثال
حبهدل جنابك واذل اللي جابك وحيكون عذابك ده فوق الاحتمال
وامرمط سعادتك واهزأ سيادتك واخلي كرامتك في حالة هزال
وتلبس قضيه وتصبح رزيه وباقي حياتك تعيش في انعزال
حتقبل ححبك حترفض حلبك حتطلع حتنزل حجيبلك جمااااال
13 comments:
القصيدة دي قرأتها قبل كدا... جامدة طحن ... بس مع صور ليها بعد تاني ...
كمل يا ريس كمل :)
القصيدة جامدة جدا
بس انت بتحب كل العالم دي
ومجبتش سيرة العالم اللي بتحارب عشان تحرر البلد دي يعني ماهك يستاهلوا الحب برضه علي افتراض انهم من الشعب
تحياتي من ارض الحرب
والله اعدة بدحك وانا من جوة بعيط
فعلا بالضبط زي ما القصيدة بتقول
لا حول ولا قوة الا بالله بجد
بجد جامده جدا
و المدونه كلها اكتر من رائعه
استمروا
القصيدة دي أنا بحبها جداً
وفعلاً
هم يضحط وهم يبكي
بوست رائع ومميز بالصور
جميلة المدونة
ده اول زيارة ليا و ان شاء الله مش الاخيرة
جميلة اوي القصيدة ده
وك فيك يا مصر من المضحكات و لكنه ضحك كالبكاء
أجمل حاجة الصور مع الكلام
رخوالله أخى وانا بنقرا بقيت مش عارف أضحك ولا أصرخ
هم يبكى وهم يضحك
السلام عليكم
جميلة القصيدة دي جدا يا محمد
و كمان مدعمة بالصور
بقت أجمل
تحياتي :)
هو الى مبهدلنا ...هو
هو الى مشحططنا ...هو
هو الى معذبنا ... هو
حسنى يا حسنى
ههههههههههه
والله احنا شعب يستاهل الضرب
ده انا لو بقيت ريس عليكم
وحد كتب فيه كده، ده أنا أجرى وراكم واحد واحد
بس لو بقيت زيه، ابقوا انتم اجروا ورايا بأه :)
سلام يا معلم
جميلة اوي القصيدة مع الصور
جزاك الله خير اخ محمد
حسيت انها بتعبر عن شعور كل مواطن
حاسس بالبيحصل حواليه
محمد أنا محتاج رأيك بخصوص الموضوع ده
تجمع مدوني مصر .. حقيقة قابلة للتنفيذ أم حلم بعيد عن الواقع
اول ما شفتها افتكرت خطاب اللي كاتبها عشان من يومين بعتهاله كانت واحدة صاحبتي بعتهالي بس لما شفت اسمك محمد قلت في نفسي يااااااااااه دي الحاجة بتنتشر بسرعة اوي عالنت
حلوة يا محمد مع الصور روعة
جزاكم الله خير على تعليقاتكم
Post a Comment