Monday, November 26, 2007


لماذا لا نعرف قيمة من نحب إلاحين يغادروننا ؟


ولماذا نتعلق بأي شيئ منهم..بعد رحيلهم؟!

Wednesday, November 21, 2007

الجزء الثالث

نكمل الباقى :

5- thunder power

كان فى فترة السراية برضه .. واحدة زميلتى قالتلى ان فى شغل سيلز و مرتبه كويس قلتلها طيب مفيش مشاكل .. المهم ادتنى رقم الراجل عشان اكلمه و اخد ميعاد
كلمته فعلا و حددت ميعاد و رحت .. دخلت لقيت شقة صغيرة كدة و مرتاحتش للجو يعنى محستش انها حاجة جامدة..المهم الاوفيس بوى قالى معاك cv ? رحت مديله الفلاشة فدخلها للراجل جوة و سابنى قاعد شوية..طبعا فاهم انا الحركات دى
شوية و دخلت .. كانو اتنين قاعدين واضح انهم هم الى ماسكين الموضوع..واحد فيهم مكنتش مرتاحله خالص و تأكدت انى لو اشتغلت معاهم كان لازم هيحصل مشاكل بينا
هى شركة بتعمل ديزاين للمواقع و بتدى دومين و الكلام دا .. شغل نت يعنى .. و هم كانو عايزين ولاد للسيلز و بنات للتيلى سيلز..هو مرتبهم كان كويس بس زى ماقلت محستش انها شركة جامدة و كمان كنت قلقان من شغل السيلز و اللف والدوران
كمان حاجة انا صعب انى ابيع او اسوق لمنتج انا مش واثق في مدى جودته ..
المهم دى كانت غلطة منى لانى كان لازم اجرب و حتى لو الشغل فيه مشاكل احاول انا اظبطها..بس الحمد لله ادينا بنستفيد

6- logic

رحت انترفيو عادى فهمت انى هشتغل فى الماركت ريسيرش بس شغلى هيبقى داتا انترى و المرتب كان كويس..كنت رحت الانترفيو دا فى فترة السراية برضه
طبعا الداتا انترى شغل معوق بس انا قلت انى هبقى موجود فى جو الماركت ريسيرش و اكيد هستفيد و هتعلم
متصلوش بيا الا بعدها بفترة طويلة .. تعالى بكرة .. قلت ماشى
اكتشفت بقى ان الداتا انترى ليه قسم لوحده يعنى كل الى بعمله فى الحياة الداتا انترى بس..اشتغلت بضمير عادى جدا بس كنت مخنوق من الشغل و مخنوق برضه من جو العمل .. لان المكان الى كنت فيه كان كله بنات و دا قيد حريتى قوى و ملقتش حد اصاحبه
بعد 5 ايام من العمل الممل خفت لحسن الشغل دا يأثر على دماغى و ابقى غبى ولا حاجة .. فى كمان حاجة تانية خنقتنى انهم كانو قالو اننا بنقبض باليوم و مع كدة رجعوا قالو : طيب بعد اسبوع .. ربنا يسهل .. قريب
دا طبعا انا لا اقبله فقررت انى مكملش معاهم .. قعدت بس حوالى 5 ايام

7- شركة استشارات هندسية

فى اول الاجازة خااااالص واحد صحبى قالى عايز تشتغل قلت ماشى .. فقالى طيب انه هيدى رقمى لاحد قرايبه و هيكلمنى .. قالى انه عايز واحد مخلص و انه قاله عنى اشعار و كلام كدة :D
المهم الراجل متصلش الا بعديها بكتييييييييييير كان فى اواخر ايام السراية .. لما اتصل حصل موقف بايخ قوى
يوميها كان يوم فحت نزلت الجامعة خدت الشهادة و بعدين طلعت على اكاديمية المدينة ف طريق سقارة عشان اديهم السى فى و بعدين رجعت الجيزة و بعدين رحت المعادى و بعدين رحت للراجل دا
هو اتصل بيا لما كنت فى الجيزة .. قالى انا فلان قلتله مين ؟ المهم افتكرت الموضوع .. اه اهلا و سهلا و بتاع .. قالى ممكن تجيلى انهاردة قلتله ممكن ... قالى طيب العنوان: كذا كذا
انا كنت واقف فى نص ميدان و مش معايا قلم فطلبت معايا غباء : فقلتله طيب ممكن تبعتلى العنوان فى sms ? طبعا الراجل اتغاظ و ليه حق قالى انا فى شغل هنا مش فاضى للكلام دا .. المهم حفظت العنوان و كتبته عندى على الموب
خلصت مشوار المعادى و بعدين روحت البيت قعدت نص ساعة و بعدين نزلتله ( كان يوم فحت بضمير حى )
المهم رحت لقيت المكان فاضى مفيش حد غيره موجود .. اكتشفت ان الشغل مجرد بس حاجات ادارية و انى اكون متواجد بس طول النهار.. و مرتبه مش قد كدة
الراجل نفسه لما اتكلم معايا قالى لا الشغل دا ميناسبكش و كدة .. كان راجل محترم جدا بصراحة

8- NSGB

كان والدى خد السى فى بتاعى و اداه لحد معرفة .. فبعدين اتصلوا و حددولى ميعاد انترفيو بكرة .. المشكلة بقى انها شركة تأمين على الحياة !!!
طبعا مكانش ينفع مروحش عشان والدى ميبقاش شكله وحش .. و يوميها كنت عيان جدا بس رحت و انا عايز ابوظ الموضوع
المهم رحت لقيت مكان نضيف جدا و دخلت قابلت الراجل .. قالى انها شركة تامين تبع بنك nsgb و قعد يشرحلى طبيعة الشغل بالتفصيل وانا مش مركز قوى بفكر ازاى اخلع
لحد ف الاخر قالى انت متوقع مرتب كام .. قلتله يعنى مفيش رينج محدد .. المهم اصر انى اجاوب على السؤال
مش فاكر جاوبت ولا لأ بس قلتله .. عشان بس ابقى صريح انا دلوقتى عندى جيش و لسة موقفه هيتحدد فى شهر 11 قالى طيب مفيش مشاكل لما تخلص موضوع الجيش تقدر تبقى معانا ان شاء الله .. و هو المطلوب اثباته :D سلام عليكم
بعدها بفترة طويلة قبل الكشف بتاع الجيش بشوية والدى قالى انهم عايزنى اروح اشتغل معاهم فرفضت طبعا ..

9- ECCO

اتصلت شركة اسمها ايكو و قالولى تعالى بكرة انترفيو .. على حظى كان تانى يوم رايح منطقة التجنيد اخلص ورق هناك و طبعا هناك يومهم بسنة فملحقتش ميعاد الانترفيو و مرحتش
بعدين بعتلهم ايميل اعتذار و قلتلهم انى ممكن اروح فى وقت تانى بس متصلوش
بعدها عرفت انها شركة حلوة وواحد صاحبى بيشتغل هناك دلوقتى .. بس يلا الحمد لله لعله خير

10 - شركة ريكروتمنت تعبانة

الشركة دى كلمتنى انا وواحد صاحبى تانى قالوله تعالى 4 العصر قالهم ماشى .. انا بقى قلتهم لا مينفعش خليها الظهر كدة قالو شغال
لما كلمت صحبى و عرفت انهم كلموه برضه قلتله سيبك انت تعال معايا نروحلهم الظهر و رحنا فعلا على 12 كدة
طول الطريق عمالين نتريق على البنت الى اتصلت بينا .. اصلها بتقول : فى شغل فى بنك و شغل فى (اوتيل) .. صحبى مسمعش كلمة اوتيل فى الفون .. لازم يعيشوا الدور يعنى ؟ يلا ما علينا
المهم رحنا .. دخلت انا الاول المكان الى هعمل فيه الانترفيو راحت دخلتلى واحدة أجارك الله بس واضح انها عندها حر مزمن ضربنا الانترفيو فى السريع و كان اى كلام
حصل موقف جامد .. لما خلصت طلعت هى قدامى و مشيت لحد الباب و راحت فتحته و انا رحت قعدت جنب صحبى .. فقالتلى لا انت خلاص كدة .. قلنالها اننا مع بعض .. بس جامد .. شكلها كان وحش :D
بس فكان عادى يعنى حاجة اى كلام

11- ريكروتمنت ايجبت ( تانى )

اتصلوا قريب قالولى فى وظيفة فى كايرو سكان .. ابعتلى السى فى بتاعك على الميل دا
بعت السى فى راحت بعتالى تفاصيل الوظيفة .. مرتبها جامد بس الوظيفة موظف ريسبشن
عامة متصلوش ..

12- تيلى بيرفورمانس

الشركة نزلت اعلان فى الاهرام فبعتلها عادى
جم اتصلوا بعدها بفترة تعالى بكرة انترفيو .. رحت اتلطعت شوية .. المهم فى الاخر دخلنا قاعة نعمل جروب انترفيو
البنت من اولها قالت .. الى عنده مشكلة يشتغل فى بنك يمشى من دلوقتى .. ففى ناس مشيت.. انا طبعا مش ملطوع كل دا عشان امشى .. فقعدت
الشركة بقى هى نظام كول سنتر .. شركة فرنسية بتفتح فرعها فى مصر و عايزة ناس كتير و اول مشروع ليها هيبقى مع سيتى بانك !!
فالمهم قعدت تكلم كل واحد من الى قاعدين شوية .. كان فى ناس من كل شكل الى كلية حاسبات على الى كلية مش عارف ايه على الى بيشتغل فين ..
قعدت تسال كل واحد اسالة بالانجلش و فى ناس اتعصرت .. لما جه دورى الحمد لله الانجلش بتاعى كان كويس قوى لانى شغال فى كورس انجلش حاليا فلسانى ماشى حلو
مسالتنيش كتير .. ففهمت انها عجبها الانجلش و طريقة التفكير لانى قلتلها انا عايز اشتغل كول سنتر عشان احتمالين : الاول انى اكمل في الكارير دا .. التانى انه يبقى الخطوة الاولى لمجال الماركتنج
توقعت انى خلاص اكسبتد الحمد لله ..
من كان يوم اتصل بيا واحد .. كنت واقف فى ميدان لبنان .. فبيقولى احنا تيلى بيرفورمانس تعال بكرة عشان تاخد جواب العمل
معاك قلم ؟ قلتله لا انا فى الشارع ؟ قالى طب فى كشك قريب ؟ قلتله لا انا فى ميدان :D
المهم قالى العنوان و حفظته كان سهل يعنى .. و رحتلهم تانى يوم خدت جواب العمل دا و الورق المطلوب منى
و المفروض هبدأ التدريب على اخر الشهر دا ان شاء الله


تمت

Tuesday, November 20, 2007

الجزء التانى

نكمل بقى

3- السراية

الموضوع بدأ كالتالى :
واحد صاحبى كلمنى على شغل و قال لواحد صاحبنا تالت..فرحنا نقابل الراجل عشان نعرف ايه الموضوع
رحنا لقينا شقة لسة بتتوضب و فى عمال شغالين فيها و كدة المهم قعدنا مع الراجل قالنا انه مدير التسويق فى الشركة
و فهمنا انها شركة استثمار عقارى فى اسكندرية و عايزين يفتحو فرع فى القاهرة عشان المشروع الجديد بتاعهم
المهم قعدنا فترة نفكر و انا كنت محتار لان الراجل قلنا لازم تقعدوا 3 شهور مينفعش نمشى قبلهم و دا كان معناه انى مش هعرف اروح منحة جيل المستقبل الى كنت مخطط انى اخدها
بس بعد التفكير اتفقنا احنا التلاتة اننا نتوكل على الله .. سافرنا اليكس شفنا مكان المشروع.. هو عبارة عن برجين واحد على البحر و التانى على قصر اثرى هناك
و رحنا مقر الشركة هناك خدنا فكرة عن شغل الشركة و حاجات اتعلمناها عشان الشغل
و هناك كلنا اكلة غريبة هى خليط بين الفطير و الحواوشى .. طبعا لا داعى لذكر اننى اصبت بالمغص.. بس كان يوم فحت لاننا روحنا فى نفس اليوم
خدنا بقى مفاتيح الشقة و بعدين لما رحنا لقينا انها محتاجة تظبيط كتير .. المكاتب مخلعة .. الارض محتاجة تتجلى .. فى حاجات لسة موصلتش من اليكس .. الخ
كان وصل ساعتها شاب من فرع اسكندرية يمسك الفرع الجديد اسمه محمد .. قعدنا فى فترة تظبيط الشقة حوالى 3 ايام..و كنا بنطبق اليوم كله من10 ل10
المهم لعدة اسباب صاحبى الى قالى على الشغل قرر انه ميكملش و بالفعل ساب الشغل و كملت انا و انور
كان معانا برضه استاذ جمال .. دا قريب احد اعضاء مجلس الادارة .. وجودة كان مهم لانه راجل واسع العلاقات و بيخلص فى اى حاجة .
طالبنا انه يبقى معانا واحد كمان بس دا لم يتم . كان فى اعلان بينزل شبه اسبوعيا فى الاهرام فكان اليوم دا بقعد انا و انور طول اليوم .. باقى الايام بقى واحد بيعد شيفت الصبح وواحد شيف بليل
و كنا شايلين بعض يعنى الى عنده مشوار عايز يخلصه ييجى بليل و التانى ييجى الصبح .. و هكذا
المهم كان يوم الاعلان دا بيبقى فحت و ضغط جامد على خط التليفون و الناس كلها الى بتتصل مستواها المادى عالى اه بس مش على مستوى اسعار المشروع
افتكر مرة واحد كان بيسألنى على السعر فقلتله كذا .. قالى ربنا يديكو الصحة !!
دا يوم الاعلان .. اليوم الى بعده بيبقى فى اتصالات قليله و باقى الاسبوع مفيش اى حاجة ...
هنا بقى اهم نقطة .. ان الناس فى الشركة مقدروش يوصلوا للناس المستهدفة من المشروع يعنى معملوش تسويق صح للمشروع
انا و انور محبيناش نبقى موظف عادى بيجى يقضى وقت و خلاص و ياخد مرتب .. عملنا تقرير و بعتناه اليكس عن الوضع و حطينا افكار تسويقية و دعائية اعتقد انها جامدة لا داعى للخوض فيها عشان التطويل
المهم مفيش استجابة خالص .. كل الى خدوه من الكلام الكبير الى بعتناه اقتراحين :
1- يتحط ارقام موبايلاتنا على الاعلان عشان الضغط على الخط الارضى
2- يتحط صورة الview المطل على البحر ( و دى حطوها مرة و بعدين رجعو للاعلان القديم التعبان )
المهم حاولنا كتير قوى بس مكانش فى اى استجابة..بل ان استاذ جمال سافرلهم اليكس و قابل عضو مجلس الادارة دا و اتكلم معاه كتير
.. و بالتالى قررت انى اسيب الشغل بعد ما قعدت هناك حوالى شهر و نص تقريبا
انا اول ما رحت الشغل توقعت حاجة و طلعت صحيحة .. انهم مكانوش فاتحين الفرع بناء على دراسة معينة و تخطيط دقيق .. لا كانت مجرد تجربة تكلفتها كلها مش اكثر من تكلفة اعلان واحد فى الاهرام
كان فى اخطاء كتير بس لا داعى للتطرق ليها .. بس فعلا ادركت ان فى مشكلة ادارية كبيرة جدا فى مصر
كان فى بقى مواقف و طرائف كتيييييير فى المرحلة دى يمكن اطرف موقف لما فى يوم قررت انى اشتغل انور صاحبى
اتصلت من البيت و عملت نفسى عميل .. لا و ايه قعدت اتكلم بالانجلش..هو الانجلش بتاعه كويس بس من المفاجأة بقى اتلخبط و كانت مأساة
بعدها اتصلت و اتكلمت عربى عادى فالمهم بقوله طيب فى مهبط طيارات هليكوبتر ؟ قالى لأ ممكن تركنها فى الجنينة طبعا انا فتحت فى الضحك و كشفنى
هو بقى عملها فيا كتير و مكنتش بكشفه دايما لانه بيعرف يغير صوته بس معملش فيا اشتغالة جامدة.. انا بقى بعدها علطول بقى بيفقسنى لانى مبعرفش اغير صوتى
بس فعلا اشد حاجة فى الشغل لما يبقى معاك واحد صاحبك .. يعنى رغم ان كل واحد كان بيشيل شيفت بس الى كان بييجى الصبح كان غالبا مش بيمشى فى ميعاده بل بيمشى متاخر كتير
بيبقو فاهمين بعض و بيساعدو بعض كتير ... فى موقف جامد عدى على الواد انور على فكرة ممكن يخش هو يحكيه
بمناسبة انور الولد دا من اطيب الناس فى اصحابى و راجل بحس انه نقى لا بيلعب ولا بيحور و راجل بمعنى الكلمة .. هو ما شاء الله بدأ بداية كويسة فى الكارير بتاعه فى مكان تانى ربنا يوفقه

4- شركة مش فاكر اسمها :
كنت فى السراية و وواحدة اتصلت بيا .. هى شركة بترول تقريبا فى المهندسين و عايزين ناس فى ال hr
كانت عايزانى اروحلها ف نفس اليوم طبعا مكانش ينفع .. فقلتلها طيب هاجى ماشى بس انا عندى جيش لسة موقفه متحددش فايه النظام ؟ ياكل معاكو الكلام دا
فقالتلى طيب هسأل هنا و اكلمك تانى .. و طبعا متكلمتش

Tuesday, November 13, 2007

سوق العمل فى اشهر

اليوم اتكلم عن فترة من حياتى و هى الفترة ما بين التخرج و الحصول على الاعفاء من الخدمة العسكرية
قولولى مبروك
:D


هتكلم عن خبراتى مع سوق العمل فى الفترة دى لسببين :
1- ربما دا يضيف لخبرات الناس حاجة ولو قليلة
2- عشان عايز ارتب افكارى

بسم الله نبدأ :

1- اسلام اون لاين

فى فترة الامتحانات كنت شفت اعلان على موقع عشرينات
job vacancy
المهم لقيت انهم عايزين واحد يمسك منتدى .. طبعا انا اهتميت جدا لانى راشق على النت منذ ردح من الزمن
ظبطت السى فى على اساس الوظيفة دى
بمعنى انى كتبت فيه خبراتى على النت و كتبت انى عندى بلوج و الكلام دا
المهم بعد ما خلصت الامتحانات بشوية لقيتهم بيكلمونى و اكتشفت انهم موقع اسلام اونلاين القسم الانجلش
الراجل قالى تعالى بكرة اعمل تست
رحت عملت التست على الكمبيوتر كان بالانجلش و فيه اسألة عامة و اسألة مواقف و غيره .. كان امتحان شديد يعنى
المهم الراجل قالى لو نجحت فى التست دا هنكلمك تيجى تعمل انترفيو فى خلال اسبوع كدة
طبعا عدى اسبوع اسبوعين تلاتة .. انا قلت انا كدة سقطت .. بعدها فوجئت انه اتصل
انا كنت عايز اقوله انت لسة فاكر
المهم رحت وواثق من نفسى جدا و رحت قعدت مستنى .. شوية و راحو مدخلنى مكتب لقيت 3 قاعدين .. راجل شكله افريقى او امريكى و بنتين .. البنتين شكلهم جداد فى الاتش ار و كان شكلهم قلقانين زيى .. الراجل بقى كان جامد
طبعا الانترفيو انجلش و انا مرة واحد نسيت الانجلش .. عكيت عك محترم يعنى
لا و كمان نزل عليا غباء مغولى لما الراجل قالى شايف نفسك فين بعد سنة ؟؟ قلتله فى الجيش :D
يالا ما علينا .. هو لما عرف انى عندى جيش راح معلم على السى فى
طبعا عرفت انى كدة سقطت و متصلوش بعدها .. بس بصراحة كان اصعب انترفيو عدى عليا لان الراجل كان بيسأل فى تفاصيل دقيقة جدا بالانجلش يعنى موقفى من النصارى و حاجات كدة فى وقت الانجلش بتاعى كان فى التليين .

2- ريكروتمنت ايجبت

دى شركة ريكروتمنت يعنى توظيف كانت نزلت اعلان فى الاهرام و بعتلها
المهم كنت فى كلية طب بقابل ناس صحابى كانو مخلصين امتحانات لقيت واحدة بتكلمنى بالانجلش
فرديت عليها بالعربى راحت قالتلى :
sorry u're supposed to talk i english
قلت اوكى و ماله .. هى اسمها بولين و مش مصرية اصلا
طبعا كنت فى الشارع و سامع بالعافية .. زهقتها منى مش سامعها خالص
المهم قالتلى انها هتبعتلى التفاصيل على الميل و ان الشغل فى موبينيل و الانترفيو بكرة قلتلها بتحصل :D
روحت بقى لقيت باعتنلى ميل فيه عنوان الشركة .. فى المقطم !!! يااااه دانا عمرى مارحته ولا عايز اروحه
و العنوان اصلا باعتينه فى عريضة كأنى رايح القمر مثلا
بس بصراحة كانت وصفة جامدة وفرت عليا السؤال ..و فى واحد صحبى كان سبقنى بكام ساعة فظبطتنى برضه
المهم رحت هناك دخلت لقيت جروب قاعد .. نزلو علينا بامتحان انجلش متخلف و امتحان اى كيو عينك متشوف الا النور
غالبا محدش نجح فيه .. المهم
خلصت انا و اتنين تانيين فى نفس الوقت فدخلونا مكتب كدة ..و جه واحد رحب بينا و بتاع
هو الشغل كان كاستمر سيرفس فى موبينيل .. فالراجل قعد يبص فى السى فى و يسأل كل واحد سؤالين هبل كدة
باباك بيشتغل ايه تاريخ ميلادك كام .. حاجات كدة
فهمت انه كان بيشوف الاكسنت بتاعة كل واحد فى الانجلش اللهجة يعنى
فجه على الانتين التانيين قلهم انتو متنفعوش عشان الانجلش بتاعكو
جالى انا قالى الانجلش بتاعك كويس بس المشكلة عندك فى الجيش...خييييير
بس انا مزعلتش لانى مقاليش انى الانجلش بتاعى مينفعش .. و دى موبينيل يعنى

هووووف تعبت .. هكمل بعدين ان شاء الله
الحلقة الجاية بقى ..
السرااااااااااية :D


Sunday, November 4, 2007

الاهداف حقيقة ام سراب



السلام عليكم ورحمه الله وبركاته
طبعا العنوان غريب شوية انا عارف بس انا برضة لما سمعت الكلام ده استغربت ..
هى القصة بسيطة ..
كنت المفروض انى بعمل تحقيق فى الكلية عن اهداف الشباب وهل هما عندهم اهداف ..
يعنى المفروض انى كنت بغطى الموضوع كله بكل جوانبه ..
المهم فى مرة كنت بسأل طالبة فبقولها انتى عندك هدف
فقالتلى اه انى افضل فى كلية تجارة لمدة 10 سنوات
فستغربت اوى ليه هى بتقول كدة فقالتلى انها عاوزه تفضل فى الكليه مع الشلة الحلوة دى والاصحاب ..
ففضلت استدرجها فى الكلام اكتشفت ان الولد اللى معاها عنده نفس القصة نفسه برضة يفضل فى الكلية الوقت ده
.. حسيت من كلام الشباب فى الكلية ان اغلبيتهم مش عارف يفرق بين الهدف والوسيلة وكمان هناك كتير من
الشباب مش عندهم هدف كتير منهم بيقولوا ان الاحوال الخارجية هى اللى سبب ان الشباب مش عندهم هدف وبعضهم
بيقول ان السبب ان الاب والام مبنوش من الاول قيمة الهدف فى نفوس اولادهم
وبعضهم بيقول الاحباط هو اللى مخليهم كدة
انا بس مستغرب هل فعلا العيب فى الشباب وليه معندهمش هدف
ولا العيب من البيت اللى مش بيهتموا بااولادهم اساسا
ولا العيب من ايه اصلا
هل من الاحوال الاقتصادية
يمكن عشان الشباب اللى نفسهم يحققوا هدف مش عارفين
عشان معندهمش التكاليف
المادية اللى تحققلهم هدفهم
طيب الشباب دول هيعملوا ايه
الشاب اللى بيقول ربنا يرحمنى لو ملقتش شغل ده هيعمل ايه
ولا الشاب اللى فاقد الامل بسبب الوسايط هيعمل ايه
.. هيوجهوا مشاكلهم ازاى ..
واللى المفروض نعمله ..
مش عارف
عموما انا همرر الموضوع ده على بعض الناس اللى بيأثروا فيا يمكن اعرف الحل منهم

واخيرا:

من وجهه نظر كل من ملك وان الاوان