Sunday, December 14, 2008

السنة الجديدة

انا فرحان ان السنة الجديدة جاية وبرضة انا خايف اوى منها

فرحان لانى بفكر اعمل خطة بقى فى حياتى كلها من اول السنة بعد التغيير اللى انا حولت فى خلال السنة اللى فاتت اعملها

بس خايف من ايه


من أحداث السنة الجديدة


فى ايه مش عارف


ربنا يسهل

Sunday, October 19, 2008

جبنة وخيار

"الحمد لله "
كانت هذه الكلمة التى انهت بها أمرءه عجوز كلامها حينما كانت تلتقط اللقمات الأخيرة من الجبن والخيار حيث كان يجلس معها زوجها وكانوا قد أشتروا قطعة من الجبن لا تزن الربع كيلو وأيضا الخيار الذى لا يزن الثمن كيلو حيث كانوا يلتقطوا غدائهم كأى إنسان ولكن فى المسمى .. وكانوا يجلسون فى جانب من الطريق حيث ظهر عليهم المشقة من تعب الطريق فأرادوا ان يستريحوا ويأكلوا أكله لا تعنى الكثير لأحد منا فكانت أعينى عليهم فى هذا اليوم وأنا انتظر أحدى أصدقائى .. كل ما جذبنى فى هذا المنظر هو مدى حمدهم وشكرهم لنعمة ربنا التى أعطاها لهم وانا عينى ترتجف من الدهشة ليس لإنى لم أشاهد هذا من قبل بلا شاهدته كثير ولاكن هذه المرة غير كل مرة حيث التعب الشديد والأرهاق الذى يظهر على وجوههم وحيث المكان الصغير فى جانب من الطريق فوق الرصيف والجلسه على ركبتيهم كل هذا ليستطعموا لقيمات من الجبن والخيار والغريب الذى شدنى وجعل أعينى تنظر إليهم هى البسمة التى تملئ وجوههم كأنهم أستطعموا قطعة كبيرة من النعم التى لا يستذوقها غير الأكابر أصحاب العربيات والملايين وغيره وغيره.
وفى الجانب الأخر رجل عجوز كان يستلقط أنفاسه الأخيرة من الجرى وراء الأتوبيس وكل ما يحمله هو كيس به قطع من الخبز وكل ما يقوله أيضا وهو يسرع لكى يلحق بالأتوبيس " ثوانى يابنى " كل أمانيه فى هذه اللحظة ان ينتظر السائق لكى يركب ويذهب ويستريح من التعب الذى لم يبارحه فى هذا اليوم وكانت الإبتسامة تنير وجهه عندما لحق بالأتوبيس .
وأما الأخر فكان الرجل يجلس فى عرباة ذات الثلاثين فى الثلاثين متر والتكييف والراحة والهدوء والسرعة التى لا تفرق معه إذاحدث شئ لانه يعلم كل العلم إن لديه المال الذى سيعوضه إذا حدث شئ .
أخيرا.......,
هى دى الحياة
اللهم انك عفو كريم تحب العفو فاعفوا عنا

Wednesday, September 24, 2008

بطاطا .. يا حبوب

موضوعي اليوم فعلا ممكن يستفز الكثير من الناس
احنا شايفين في الآونة الأخيرة شغالين علينا اعلانات المدام فشخرة وجوزها الاستاذ محسن
منظر وعايزين يفهمونا ان هو دا حال الامة المصرية والاسرة المصرية
ان احنا مفتريين وبتوع فشخرة ومظاهر كل دا علشان اشتكينا من غلاء الأسعار وكأن لسان حالهم يقول
(مش انتو اللي اشتكيتوا؟؟ خدوا عندكم بقى)

بإختصار يا سادة يا كرام اعلانات مدام فشخرة والاستاذ محسن هي اعلانات تصور اسرة مصرية مفترية الى ابعد
الحدود وطبعا الاسرة دي لا وجود لها ولا حتى اسرة شبيهة لها في ارض الواقع

تخيلوا انهم مصورين الاسرة المصرية بتتسحر بخروف !!
لالالالالا استنوا دا مش خروف بس دا اللي شاف الاعلان هيعرف تعليمات السحور بتاعة مدام فشخرة حاجات
بحوالي 2000 جنية
والله هم يضحك وهم يبكي

انا عايز
اعرف انهي منطق يقول ان ممكن اسرة تتسحر في يوم بالمبلغ دا؟؟

والله دا لو عازمين جانكيز خان والمدام والاولاد ومعاهم كمان هولاكو مش هيتسحروا كدة

بجد حاجة تحرق الدم

لا والراجل اللي بيتكلم في الاعلان دا عليه رزااااااااااالة

وهو بيقول

اللى يولع الأسعار و يخرب الجيوب هوا الفشخرة و المنظرة يا حبوب
ونقول ليه السكر غلي وليه الرز غلي وايه اللي غلى التوم ياعم صحي النوم

والله بجد لو حد من دولة تانيه شاف الاعلان دا اقل حاجة هيقول علينا اننا نستاهل الابادة الجماعية

للاسف ميعرفوش ان المواطن المصري (العادي يعني....مش ساويرس(ولو انه موش بيتسحر) ولا عز ولا طلعت مصطفى
يكفيه طبق فول بالزيت وبيضة وعلبة زبادي في السحور وفي الفطار هو صنف واحد ولو عمل صنفين ينعي حظه طول
الاسبوع

واخيرا انا لله وانا اليه راجعون

Tuesday, September 9, 2008

صراع مع النفس


السلام عليكم ورحمة الله وبركاته.
انا فى صراع مع شخصيتين .. شخصية نفسها تستمر زى مهيا وهى شخصية محمد القديمة ( المرح اللى بيحب الهزار - اللى شايف الناس كلها كويسة ومحد بيكون وحش غير لما نتعامل معاه بطريقة وحشة ) طبعا محدش فاهم حاجة . تعالوا هحكلكوا حكاية صغيرة يمكن تفهمومها .


انا زمان لما كنت فى الكلية مع أصحابى .. كنت بحب اهزر وكانت شخصيتى اللى معروف بيها هى المرح والعفوية يعنى لما بحب حد مش بعرف أخبى لازم أقوله ممكن تقولوا عبيط بيوقع على نفسة على طول .. شايف الناس كلها كويسة وان الدنيا فى كويس بس ومفيهاش حاجة وحشة خالص او ممكن نقول ان ظروفها هى اللى بتغيرنا يعنى لو الشخص نفسة وحش بسبب ظروف مرت عليه ساعتها مقدرش اقول انه وحش لا بقول ان الظروف هى اللى جعلته كدة .. انا بقى كنت كدة شايف الدنيا وردى .. الناس جميلة والحياة أجمل بس اللى يفتحلها دراعه .. وان الناس كلها 100 % وقصة 100 % دى كبيرة اوى ..


هحكلكوا الحكاية .. انا كنت بشوف الناس كلها انها 100 % كويسة وكنت بتخانق كتير مع خطيبتى فى الموضوع ده وأفضل أقولها يابنتى اسمعى الكلام الناس كويسة وطول محنا كويسين معاها هما يكونوا كويسين .. وهى تقولى يابنى اسمع الكلام لازم تكون 80 - 20 طبعا


وقصة 80 - 20 دى طويلة بس مش قوى


تعالوا هحكلكوا الحكاية انا خطيبتى اللى بحبها اوى على طول بتبص للناس بدرجات متفاوته .. يعنى ممكن تنظر لواحد انه 80 -20 وواحد تانى 70 - 30 ومعنى الكلام دة ان الرقم الكبير هو رقم الرضا عم الشخص والرقم الصغير هو رقم الحذر من الشخص نفسة عششان لو عمل اى حاجة وحشة متتصدمش وهى بالطبع حطاله نسبة تغيير فلو حصل عادى مهى متوقعة فبالتالى مبتتعبش.




انا بقى أتصدمت



عشان كدة غيرت رأى.



وهكون بشخصية جديدة ..



حد فاهم حاجة؟


Tuesday, August 12, 2008

انا خلاص خطبت


بيقولوا
(محمد خطب خلاص يا جدعان)
العنوان المكبوت : البقاء لله

المكان : داخل افواج القلب

الزمان : راح خلاص

الموضوع : محمد شاب طموح .. كل ما يأمل فيه هو عمل فى مكان برفوشنل ( زى مبيقولوا ) عاوز عربية بروفيشنل ( برضة زى مبيقولوا ) وعاوز يعيش حياه كووووول ويخلف عيال كوووووووول يقولوا على ان الأستعمار ده حمار

المهم نرجع لموضوعنا .. الواد ده بقى تخيلوا خطب .. ينهاااار .. اه والله خطب وخلاص بدأ الهموم ..


الشقة فين يا محمد .. والله عمال ادور يا عمو.

طيب المكان عاوزة يكون فين يا عمو .. ياريت حاولينا ..

طيب البيسين يكون قدام البيت ولا فى البدروم .


ينهاااااااااااار .. يلا يا محمد


أبدأ فى الحياة المشغولة وأعمل لنفسك بيزى ( زى ميقولوا) اظاهر ان كل الناس هتقول بس عليا.



يلا ربنا يخليلى المدونة اللى بتفضحنى على طول



سلاموووووووووووووز



ادخلوا قولولى البقاء لله

Sunday, July 13, 2008

الجزء الاول



السلام عليكم ....



انا نزلت قبل كدة موضوع عن السر او the secret


وقولت انى هتكلم عنه ان شاء الله .



فأنا قررت والحمد لله بعد حرب مع النفس وتفكير عميق انى انزله النهاردة


وانا قاعد برضة فى الشغل .. مش عارف ليه الحاجات الجامدة مش بتيجى إلا فى الشغل ليه

يلا يارب اعرف اشرحه ..

المهم فى البداية انا احب انى اوضح كام نقطة .

1- حابب انى فى الاول اتكلم عن نيتى انا ليه ناوى انزل شرح تفصيلى عن هذا الكتاب ..


انا يمكن نيتى اول مقرأت الكتاب هى انى كنت عارف انه بيتكلم عن النفس البشرية وبيتكلم عن التغيير ولكن بطريقة غيرمباشرة.

بس وانا بقرأه كنت بحس فعلا بمعنى كل كلمه .. انتم يمكن هتشوفوا وانا بنزله هتلاقونى بنزل بعض الجمل اللى بالانجليزى عشان مهما حصل انا مش هقدر اشرحها زى مهى موجودة لإن معاناها بالانجليزى اجمل من انها تترجم ..فأنا نيتى ان يمكن واحد بس يدخل المدونة ويقرأ الكلام ده وفعلا يتغير .. ويحاول انه يكون ليه بصمة ولو كانت صغيرة فى حياته تأثر فيه او تأثر فى حد تانى ويتغير بسبب كدة .. فيارب اقدر اغطى الجزء ده ..


2- النقطة الثانية برضة حابب ان الناس تحاول توسع ثقافتها وتقرأ فى كل حاجة سواء كان انجليزى او عربى عشان فعلا فى كتب جميلة بالانجليزى فعلا رائعة انا مش بقول انى جامد فى الانجليزى والكلام ده .. انا اساسا لما بقرأ كتاب بالانجليزى بيكون جمبه القاموس على طول .. بس بحاول فانا اقصد انكم برضة تحاولواا فى الموضوع ده عشان هيفدكم اوى.


المهم ندخل بقى فى صلب الموضوع ..

انا النهاردة مش هتكلم اوى وارغى بس انا هقول فكره عامة عن الموضوع عموما وبعدين هبقى اتخصص في كل نقطة ونحاول نجرى فيها حوار مع بعض ونخرج بحاجات مستفيدين بيها .


فى البداية زى مقولت ان الكتاب اسمه السر اوthe secret



بيتكلم عن التغيير او بيتكلم عن السر اللى بيخلى الواحد يعمل اللى هو عاوزة بطرقة صحيحة ويحقق مكنونته

ووجوده ورغبته فى الإشباع.

بدأ الكاتب فى البداية بتقديم بعض الجمل عن هذا السر والذى يقوم بعض الكتاب او المستشرقين او الفلاسفة بالتحدث

عن السر


المهم وانا بقرأ الكتاب كانت دماغى عماله تيجى وتروح

ايه هو السر وليه سموه بالسر

هل من الممكن ان يكون هذا السر هومفتاح الابتكار

وكنت عمال اجرى بالصفح يمكن القطالسر بس مش عرفت

واسئلة كثيرة وكثيرة راودتنى عند قرائه هذا الكتاب

فى بداية الكتاب كان هناك بعض الجمل كما قولنا عن بعض الفلاسفة والأساتذة عن هذا السر

وسوف اسردهم كماهما بالانجليزى


The Secret gives you anything you want: happiness,
health, and wealth





You can have, do, or be anything you want






We can have whatever it is that we choose. 1 don't
care how big it is






This is the Great Secret of Life.






Alt of this happened because of knowing how to
apply The Secret




طبعا انا مش جبت كل حاجة .. بس انا اللى عاوز اقوله فى المرحلة دى ان الواحد مننا بيكون عنده طاقة كبيرة اوى وانه بيفضل يبحث عن الحاجة اللى هو يقدر يعملها عشان يفرغ فيها الطاقة دى .. انا اوقات بيقبلنى ناس كتير كل مسئلهم عن هدفهم او اقولهم انتم نفسكم تكونوا ايه .. يقولوا ان نفسهم يكونوا حاجة كويسة بس ايه هى مش عارفين

انا مش بقول انهم غلط لا خالص هما عندهم الطاقة انهم يكونوا حاجة مختلفة بس ازاى مش عارفين


انا يمكن عندى كلام كتير بس هخليه لبعد كدة


بس احنا هنتكلم مع بعضيتا عن الحاجات اللى الواحد يبدأ بيها عشان يكون احسن وعن المشاكل اللى الواحد بتواجهه فى انه يضع هدف فى حياته انا طبعا مش خبير ولا الكلام ده انا عادى بس انا خدت بعض الخطوات فى سنوات كتيرة عشان اكون كويس فأنا هقول اللى عملته عشان محدش يمر بالفترة دى كلها ويختصر احسن الطريق على نفسه.



و يمكن مش بعرف اشرح اوى بس هحاول انى اوصلكم الكلام اللى حسيت بيه وانا بقرأ الكتاب


يارب اقدر


وجزاكم الله خير

Saturday, July 12, 2008

احساس بدون وصف


اوقات بقعد مع نفسى وافضل اقول هو الماس اول مكتشفوه قالوا عليه ماس ..


ولا فضلوا يفكروا لحد مكتشفوا الاسم ..


طيب لما الواحد بيقول لحد انت عامل زى الماس ..


بيكون فرحان اوى على الرغم من ان كلمة الماس مكنتش موجودة قبل كدة ..

طيب ده بيتقال على الجماد ..




طيب لما الواحد بيكون بيحب حد اوى يقوله ايه




Wednesday, July 9, 2008

مذكراتى


السلام عليكم ورحمة الله وبركاته



طبعا انتم فاكرين الموضوع اللى كتبته قبل كدة اللى اسمه اصحاب ذو فكر راقى


فى الاخر كنت كاتب انى هتكلم عن المراحل اللى عدتها فى حياتى سواء كانت فى الدراسة او الانشطة اللى فى الكلية او الحياة عموما


فإن شاء الله ناوى اتكلم عن الموضوعات الاتية خلال الفترة القادمة ان شاء الله


عشان فى ناس فعلا انا محتاج اتكلم عنهم عشان فعلا الناس دول ضافوا لحياتى كتير وعلمونى حجات كتير


ان شاء الله هتنزل على 5 اجزاء



قسم إدارة



our vision



ABC



LIVE



بداية للتنمية البشرية


انــــــــ شـــــــــاء الله



Sunday, July 6, 2008

اوقات بحن




الواحد ساعات بيعدى عليه اوقات يحن لحاجات كتيرة اوى فى حياته .. سواء من اول حياته لحد دلوقتى


يعنى من اول مكان فى الحضانة وهو لسه بيلعب مع اصحابه او ممكن نقول ان الوقت ده كان كل حاجة يعرفها فى الحياة هى اللعب انه يصحى من النوم وينزل الحضانة وعارف انه رايح عشان يلعب وعشان يقابل اصحابه.. وأول مخلاص بدأ يكبر شوية والحياة بدأت تكبر بكل حاجة بمشاكلها وبهمومها وبفرحها وبكل حاجة بس طبعا فى الوقت ده مكنش الواحد بيفكر إلا برضة فى حياته اللى بتتلخص فى اللعب وتحقيق بعض الاهداف اللى الواحد ميعرفش كانت ايه بس عارف ان هناك حاجة محتاج الواحد ان يشبعها بس ايه مش عارف .


وبدأ الواحد يكبر .. ويكبر لحد موصل للثانوية ومعارفه بدأت برضة تكتر اصحاب .. اصحاب .. اصحاب وبدأ فى الفترة دى يختار بين الاصحاب الكويسين والاصحاب اللى مش كويسين او السوء بمعنى اخص.. وبدأ يروح فى الجهه اللى بتحقق اهادفه بس ايه هى اهدافه ميعرفش بس برضة اللى ممكن نسميها الإشباع..


يمكن الواحد مش فكر إلا متأخر فى موضوع الاهداف بس الحمد لله فكر وعرف ..


المهم كبر وبدأ يدخل الجامعة ويتعرف على اصحاب جدد تانى ليهم فكر اكبر وطموحات اعلى وبدأ يفكر انه يكون زيهم


وفعلا بدأت الاهداف من هنا تنطلق .. وبقى ليه اهداف نفسه يحققها.


وسعى كتير وفضل يمشى مشاوير كتير فى حياته متجه الى الهدف اللى عاوز يحققه ..


واتخرج .. واشتغل وحقق جزء من الاهداف وبيسعى انه يحقق الباقى ..



بس برضة بحن لطفولتى .. انى العب وارجع تانى افكر فى حياتى البسيطة ..


حجات كتيرة الواحد مش بيفتكرها إلا لما يكون عاوز يفتكرها.


يلا هنفتكرها وهننساها ونرجع تانى نفتكرها


المهم انها تكون دافعه ايجابية للى بعد كدة


يلا ربنا يسهل ويستر

Thursday, July 3, 2008

امتى هتعلم؟


اوقات كتير الواحد بياخد قرارات غلط فى حياته.


طبعا فى البداية ميعرفش ان القرار ده غلط .. بس بيخده


وفى الاخر يندم على القرار ده


ويرجع تانى وياخد قرار تانى وبرضة يندم على القرار اللى خده



وياريته يتعلم



يارب علمنى .. انا محتاج انك تعلمنى وتخلينى لو مرة فى حياتى اخد قرارات ومندمش عليها.

Sunday, June 29, 2008

اصحاب ذو فكر راقى


اولا : السلام عليكم ورحمة الله وبركاته




ثانيا : اهلا بيكم فى مدونتى ونورتوها كالعادة.. ويارب تكون حلقة التواصل بينا لو الدنيا شغلتنا




طبعا انا مش بعرف اتكلم فى حجات ذى كدة.. يعنى




بس انا يمكن الشركة اللى شغال فيها عملتلى عيد ميلاد كدة واحتفالنا..




بس يمكن العيد الميلاد ده مش اثر فيا ذى مانتم اثرتوا فيا..




بجد انا مش بتكلم كلام وخلاص او انى لازم اقول الكلام ده ..




بس الشركة لازم تعمل الموضوع ده كشئ من التحفيز للموظفين فكان عادى بس مش هقول انى مكنتش مبسوط




.. لا طبعا .. بس عارفين لما يكون فى حد دخل وقال لحد تانى كل سنة وانت طيب




ومهتم انه يقوله كدة بتكون احسن من اى حاجة مخططه مسبقا..




فبجد انتم ناس جامدين جدا جدا ..




وفعلا يمكن كل واحد منكم اثر فيا سواء كان فى شغل فى الكلية او احداث بسيطة او اصحابى طبعا




يمكن السنة الجديدة معرفش هيكون فيها ايه ..




مين الناس الجداد اللى ممكن اقبلهم فى خلال السنة الجديدة وحياتى هتكون عامله ازاى ..




بس الحاجة اللى متأكد انى فعلا هفتقدها هو انتم ..




مش شعارات والله ولا حاجة بس فعلا انتم ناس تعطى ولا تنتظر المقابل ..




يعنى يمكن اغلبكم لما اشتغلت معاه فى كذا حاجة كان فعلا بيعلمنى


مكنش بيخاف انى اكون احسن منه او انى اخد مكان اكبر منه ..




لأ كان كل همه اننا نتعلم من بعض ..


اما فى الواقع العملى هيكون عكس ذالك ...


الناس كل كلامها بالفلوس وعمرى مهديلك خبرتى ببلاش




عشان انت تكون احسن منى بس خلينا نقول ان ده مجرد توقع..






تعالوا بقى ندخل فى المهم ..




انا حابب اقول استفدت ايه من كل واحد منكم...


سواء كان فى الشغل ذى مقولنا او انشطة او مقابلات عابره ..





اولا:




استاذى الكبير طارق شحاتة(اتعلمت منه ازاى اكون hard worker



ثانيا :




عمرو عادل يمكن مصدفناش اننا اتعملنا اوى مع بعض

بس اتعلمت منك انى مينفعش كل حاجة اخدها على نفسى عشان متعبش




ثالثا :

اتعلمت من خالد انى وقت الشغل لازم اكون حازم ووقت خارج الشغل


لازم اكون مهيس بمعنى الكلمة..ودى كانت فعلا حاجة فيا محتاج اعدلها ..

شكرا اوى يا خالد .. وعلى فكره انا جى الحفلة ان شاء الله :)








رابعا:


اما استاذة امانى الحكمة .. اتعلمت منها انى اكون حكيم وانا بتكلم






خامسا:


اما نيرفانا فيمكن متعملناش اوى مع بعض بس اتعلمت

منها انى مش لازم اعرف الناس فى الواقع وبس لأ فى ناس

كويسين من غير متشوفهم فى الواقع واوقات يكونا احسن كمان من الواقع








سادسا:

اما استاذ سامو فأحنا متعملناش خالص مع بعض ..

بس بجد شكرا جدا على اهتمامك وبجد يمكن الكلمة بسيطة بس معناها بالنسبة ليا كبير








سابعا:


اما العموووود الكبير ابراهيم الشرقاوى ..

اتعلمت منك ان الواحد ممكن يواظب بين حياته الدعوية وبين حياته الشخصية فعلا قدوة .. جزاك الله خير








ثامنا :


استاذى الكبير اشرف .. ذو العقل المدبر ..

فعلا والله اتعلمت منك انى اكون هادى جدا فى اتخاذ قراراتى

واشوف الحل من ابعاد مختلفة واحاول اوصل لحل مشترك افضل من حل واحد يرضينى انا بس

.. بجد ربنا يكرمك ويجزيك عنى خير










تاسعا:


استاذة انجى جزاك الله خير على اهتمامك يمكن برضة

مش اتقبلنا او اشتغلنا مع بعض بس اهتمامك بإنك تقوليلى كل سنة وانت طيب

خلانى فعلا اقولك شكرا بمعانى مختلفة .

.يمكن ذى مقولت انك تفتكريها عادية بس بالنسبة ليا فعلا مش عادية










عاشرا:


استاذة خلود عموود اورفيجن والعقل المدبر ..

بجد اتعلمت منك حجات كتييييييير اوى ..

اكتر حاجة اتعلمتها انى اكون مرن فى تعاملاتى وكمان

انى احفز اللى قدامى انه يعمل اللى هو عاوزه بس بطريقة مختلفة ..

بجد اتعلمت منك الولاء .. ازاى يكون عندى ولاء لحاجة فعلا انا مؤمن بيها ..

بجد جزاكى الله كل خير ويارب نتقابل فى الواقع العملى مع بعض عشان اتعلم منك اكتر واكتر..










الحادى عشر :


استاذة اميرة انا اتعلمت منك انى احاول اسمع مشاكل الناس

واحاول اوصل لحل لمشاكلهم

وان الدنيا مفهاش انا وبس لأ فيها ناس محتاج الواحد برضة

يسمعهم ويحل مشاكلهم ,, بجد جزاكى الله خير وربنا يوفقك فى حياتك .








الثانى عشر:

اسلام يوسف والله العظيم انا مش عارف اقول ايه عنك ..

بس ونعم الصديق اللى مهما حصل مش يقطع علاقته خالص بأصدقاءه ..

اتعلمت منك الوفاء انى ازاى اكون وافى مع اصحابى وانى لازم اسأل عنهم ..

يمكن انا لسه مش طبقتها بس هعملها ان شاء الله بمساعده اكتر منك ..

ياريت مش تزعل منى انى مش بسأل بس عشان خاطرى فعلا مش تبعد بسببى..

بجد جزاك الله خير ونعمة الصديق.








الثالث عشر :

استاذة امنية يمكن احنا مش اتقبلنا مع بعض إلا وقت اورفيجن

والارقام الناطقة ( وده سيم مش حد يعرفه :) غير الفيجنييرز)

بس اكيد لو كان فى فرصة شغل كنت اكييد هتعلم منك كتييير

لإنى اؤمن اوى ان كل واحد عنده حاجة مش عند التانى

ولو كلنا اتجمعنا هنكمل بعض .. فبجد شكرا اوى على ذوقك.






الرابع عشر :

استاذتنا الكبيرة ذو الفن الراقى والذوق الرفيع ..

وطبعا استاذتنا فى اكبر مجمع طلابى لحاملى الافكار ABC


فعلا والله اتعلمت منك الهدوء وحاجة تانية مش لقيلها معنى تانى غير الروشنة :)




الرابع عشر :


سيد يمكن احنا اتقبلنا كتييييييييييير اوى اوى بس

مكنش فى وقت فى كل مرة نتكلم فيها بس انتا بتفكرنى بأيام الصياعة بتاعتى .

. فتخيل ممكن اكون اتعلمت منك ايه ... انى مرجعلهاش تانى خالص خالص .. :)












انا عارف انى فعلا طولت عليكم




بس الحاجة الاخيرة اللى هقولها بجد انتم فعلا ناس جامدة جدا وفعلا والله الكلام ده مش كدة وخلاص .. بس كل واحد منكم فعلا جواه حجات رائعة لو استغلها صح هيكون مثل القائد محمد الفاتح والقائد صلاح الدين ,يكون من مخططى المستقبل وقواد الحضارة اللى كل واحد مننا بيتمنى انها ترجع تانى لمصر ..




جزاكم الله خير






وفى النهاية انا حابب انى اتكلم عن السنة اللى فاتت ان شاء الله بس فى بوست اخر هينزل خلال ايام






هتكلم فيه عن




اولا: قسم إدارة وفريق إدارة




ثانيا: our vision




ثالثا :ABC




رابعا : LIVE




خامسا : بداية للتنمية البشرية






ان شاء الله












Friday, June 27, 2008

رد على مدونة رؤية


يمكن انا مكنتش هنزل الموضوع ده .. وكنت ناوى انزل حلقات عن كتاب the secret


بس وانا بقرأ التدوينة بتاعت سالى فى مدونة رؤية


شدنى سؤال كانت كتباه ..


وهو .. من المسئول عن الظلم والقهر والكرة والقتل والدماء؟



انا يمكن مش اتفرجت على الفيلم ولا حتى البوست عرفت منه ملامح الفيلم اوى



بس لما قرأت السؤال ده استلهمت بعض المشاعر اللتى جعلتنى اسأل هذا السؤال



بالفعل من هو المسئول عن هذا ..



فكانت اجابتى هى .. الشعب فى كل مكان


فكنت اكتبها وانا خائف ان يهاجمنى احد ويعتقد انى بجانب الحكومة .. وادافع عنها ..



ولاكنى ارى ان الشعب بكل جوانبه وطبقاته هو المسئول ..


ارى السكوت عن الظلم ادى الى تفشى مرض الظلم حتى اصبح عادة يسمعها الناس ولا يتأثرونا بشئ



هناك العديد من الامثلة إذا ذكرها احدنا لن ننتهى من ذكرها لليوم التالى ..



ولكن هل السبب كما قالت الاستاذة سالى .. هو عدم وجود وحدة وطنية فقط


ام هناك اسباب اخرى لا يعلمها احد..



ولكن مازلت احتار فى نفس السؤال



من المسئول عن القهر والظلم !

Wednesday, June 25, 2008

Sunday, June 22, 2008

THE SECRET





The Secret gives you anything you want: happiness,
health, and wealth.

Wednesday, June 11, 2008

اعلان

السلام عليكم ورحمة الله وبركاته
انا كنت محتاج شقة يا جماعة
لا تقل عن 80 متر ولا تزيد عن 110
وياريت تكون ايجار قديم
اما لو موضوع التقسيم او المكان او الشكل مش مهم
المهم انها تكون ايجار قديم
ياريت اللى يعرف ولاحاجة يكتب ويقولى
الموضوع فعلا والله جد ومحتجينها اوى
لو حد يعرف يقولى
وجزاكم الله خير

Sunday, June 1, 2008

انا فرحاااااااااااان اوى ..





ازيكم .. والله وحشتونى اوى



انا عارف انى مش بكتب ويمكن بعضكم افتكر انى نسيت المدونة او انى اهملتها ..


بس مش كدة خالص .. ومش هقول انى مشغول والكلام ده بالعكس انا كنت فاضى بس مش ليا نفس ادخل على المدونة ..


بس سيبكم من الكلام الكتير ده اللى ملهوش لازمة.


انا فرحان اوى النهاردة وده مش على الفاضى ..


بس هى لاسباب كتيرة اوى اوى



هقولكم السبب الاول بس طبعا فى سبب تانى مهم اوى بس لما يحصل ان شاء الله هقولكم عليه ..



(thirty thirty) السبب الاول .. انى لقيت شغل فى شركة استشارات إدارية اسمها



وانا هشتغل في الموارد البشرية


هى consulting & business solution



طبعا ان شاء الله هبدأ اول مخلص الامتحانات .. هتخلص ان شاء الله 15/6



اما السبب التانى مش دلوقتى ..


هتعرفوه بعدييييييييييييييييين



ادعولى اوى عشان يحصل ...

Friday, May 2, 2008

مجلتنا

السلام عليكم ورحمة الله وبركاته
ازيكم يا مدونين يا جامديييييييييين اوى اوى
ايه اخباركم
بصوا بقى انا المرة دى جى وانا عاوز اشاركم معايا فى الموضوع ده بجد
ان شاء الله هنعمل مجلة
وهنزلها الاسبوع اللى بعد القادم يعنى السبت اللى بعد الجى
طبعا المجلة هتكون شاملة كل حاجة
المفروض اللى هيعملوها طلاب من قسم إدارة اعمال جامعة القاهرة
وذى مقولت هتكون شاملة كل حاجة عن تجارة وعن السوق وعن الاهداق الشباب وعن السياسة والاجتماع والاقتصاد وكل كل كل حجاة ممكن تتخيلوها
فكنت عاوزكم يا مدونيين يا جامدين انكم تشاركونا فى الموضوع ده
عن طريق ترشيحاتكم للمواضيع ..
يعنى كل واحد هيرشح موضوع هو كتبه قبل كدة وشايف انه مهم ولازم الطلاب يعرفوه
طبعا احنا الشريحة المستهدفة هم طلاب الجامعة والخريجين ايضا
اى من سن 17 سنة ل سن 25 سنة
اخر معاد ان شاء الله لتسليم المواضيع هتكون يوم الاثنين القادم ان شاء الله
اى 5/5 ان شاء الله
يتم ارسالة اسم الموضوع عن طريق لينك للموضوع من المدونة بتعت صاحب الموضوع
ياريت يا جماعة بسرعة عشان نلحق ننزل المجلة
وجزاكم الله خير

Thursday, March 27, 2008

الورقة والقلم


الورقة والقلم احد المشاعر التى يختفى بواسطتها الانسان ..


اوقات من الندم والعذاب يأتى بدون ان يبكى عليها احد وإذا بكى كان الالام الذى يسعى اليه ..


فللورقة والقلم كل الاحترام والتقدير

Friday, February 29, 2008

مدونة جديدة

السلام عليكم

اعزائى زوار المدونة

توقفت عن الكتابة فى هذه المدونة منذ فترة ليست بالقصيرة

و الحقيقة ان المدونة اوحشتنى , و كلما طالعت تدويناتى القديمة عادت الى ذكريات يخيل الى انها من ماض سحيق

رغم انها لم تتعد العام

كان لى هدف من وراء الكتابة هنا ..اعتقد انه هدف جيد و يستاهل مواصلة الكتابة

لكننى لا ادرى لماذا فقدت حماستى للمواصلة

ربما اعود ل"كش ملك" يوما ما لأواصل الكتابة

أما الآن فقد أنشأت مدونة جديدة ذات طابع مختلف

وادى ديسون

بإسم جديد و هو : ديساروف

و للاسم الجديد قصة ربما ذكرتها فى المدونة الجديدة

كما ذكرت فان للمدونة طابع مختلف .. حالم قليلا ..خيالى بعض الشىء

لكنه لن يبتعد عن الواقع كثيرا

ان شاء الله

خطــاب

Tuesday, January 15, 2008

كان يا مكان .. فى قديم الزمان


كان يا مكان فى قديم الزمان .. كان هناك ولد لديه قدر كبير من الايجابية ولكنه لا يعرف كيف يستغل هذه الايجابية .. كان يجلس هذا الولد تحت شجرة تفاح وفى احد الاوقات وهو يجلس تحت هذه الشجرة ويضع يده متشابكتان يفكر فى طريقة يستغل فيها طاقته الايجابية إذ بتفاحة تقع على الارض فكانت بداية الانطلاقة بالنسة له .. فأصبح ايجابى واخترع قانون الجازبية ..




وفى نفس الزمان القديم كان هناك ولد يفكر ايضا كيف يقرا كتاب .. حتى يكون ايجابيا ولكنه تأتى علية فترات من الوقت لا يستطيع ان يستغل الوقت الذى يأتى فى ظلام الليل بسبب تكدس الظلام ولكنه فكركيف يستغل هذا الوقت الضائع .. ففكر هذا الولد حتى ام باختراع الكهرباء وبالفعل استطاع هذا الولد الصغير ان يستغل الوقت الليلى..




وايضا فى نفس الوقت والزمان وفى نفس الايجابية والتفكير والخروج من الاواعى الى الواعى والخروج من التقليدية والسلبية الى تنشيط نقطة الارتكاز فى العقل .. راى هذا الولد الصغير كيف قومه يعبدون الاصنام التى لا تضر ولا تنفع .. ففكر هذا الولد الصغير وخرج ايضا من المنطق او ما كان سائر فى هذا الوقت انه المنطق الى الامنطقى بالنسبة

لقومه ..ولكنه فكر حتى لا يكون مثل الاله التى تعمل بدون ناتج وفى النهاية كان الرجل العظيم سيدنا ابراهيم

وَإِذْ قَالَ إِبْرَاهِيمُ لأَبِيهِ آزَرَ أَتَتَّخِذُ أَصْنَامًا آلِهَةً إِنِّي أَرَاكَ وَقَوْمَكَ فِي ضَلاَلٍ مُّبِينٍ (74) وَكَذَلِكَ نُرِي إِبْرَاهِيمَ مَلَكُوتَ السَّمَاوَاتِ وَالأَرْضِ وَلِيَكُونَ مِنَ الْمُوقِنِينَ (75) فَلَمَّا جَنَّ عَلَيْهِ اللَّيْلُ رَأَى كَوْكَبًا قَالَ هَذَا رَبِّي فَلَمَّا أَفَلَ قَالَ لا أُحِبُّ الآفِلِينَ (76) فَلَمَّا رَأَى الْقَمَرَ بَازِغًا قَالَ هَذَا رَبِّي فَلَمَّا أَفَلَ قَالَ لَئِن لَّمْ يَهْدِنِي رَبِّي لأكُونَنَّ مِنَ الْقَوْمِ الضَّالِّينَ (77) فَلَمَّا رَأَى الشَّمْسَ بَازِغَةً قَالَ هَذَا رَبِّي هَذَآ أَكْبَرُ فَلَمَّا أَفَلَتْ قَالَ يَا قَوْمِ إِنِّي بَرِيءٌ مِّمَّا تُشْرِكُونَ (78) إِنِّي وَجَّهْتُ وَجْهِيَ لِلَّذِي فَطَرَ السَّمَاوَاتِ وَالأَرْضَ حَنِيفًا وَمَا أَنَاْ مِنَ الْمُشْرِكِينَ (79)....

وكان يامكان ..



وفى زمان بعد هذا الزمان ولكنه ليس بكثير فكر بعض المدونيين انهم يكونوا ايجابيين

انهم يستغلوا اجازتهم

بس من غير ميعرفوا انهم هيتقبلوا

كل واحد عنده حاجة بس تقابلوا صدفة

وكانت الفكرة هى الفكرة

انهم يكونوا ايجابيين .. ازاى مش عارفين


بس هما بداوا يفكروا ووصلوا لبعض النتائج التى لا بأس بها


فكروا ان يكون فى يوم للنظافة العالمى فى احد المناطق الفقيرة


.. ليه لأ مش حقهم


فكروا انهم يرمموا احد البيوت الفقيرة ..


برضة ليه لأ مش حقهم انهم يعيشوا مستقرين من غير ميخافوا


فكروا انهم يروحوا دار ايتام


وبرضة هنقول ليه لأ...


فكروا ومازالو يفكروا


فكر معانا نعمل ايه


يمكن نعمل فكرتكويمكن ليه ده اكيد


نعمل فكرتك وتاخد ثواب الابتسامة او الفرحة اللى هتدخل قلب الناس اللى هتسعدهم

ومش بس ثواب ليه منغيرش فى العالم ونكون افضل ناس حتى

لو بأقل الطرق.

تعالوا نبنى اول طوبة .. ونشوف هنقف لحد الدور الكام

ومين بعدينا هيكمل المبنى.

ليه بنستنى حد هو اللى بيبنى واحنا وراه.. ليه منكونش احنا اللى نبدا


تعالوا نفكر مع بعض


ونشوف احنا ممكن نعمل ايه


هل هننتصر .. وهننجح حتى لو كانت حاجة بسيطة .. ولاهنقلب يوم من ايامنا


او صفحة من صفحات حياتنا من غير محط بصمتى هنا فى الصفحة دى


واقول يا جماعة اعملوا كذا


يلا مستنى ايه


فين بصمتك اللى هتكتبها النهاردة فى كتاب حياتك


...



مدونة آن الأوان

مدونة كش ملك
مدونة فوق صحصح
مدونة منطقة عمل


ومازالت المدونات جارية التحميل
**********
ومازالت الافكار قادمة.
1-كل المدونين يعملوا جمعية للتبرع ونوصلها بنفسنا للايتام والمعوقين ومرضى السرطان ومش بس الناس يتبرعوا بفلوس وبس دول يتبرعوا باكل ولبس وكمان في حاجة ليه ما بنفكرش نعمل في الجمعية دي سكن للشحاتين واطفال اللي ما عندهمش بيوت للسكن وبرضو داخلين في التبرعات .
2-ممكن نساعد الطلبة المكفوفين اللى بيكونه فى دار الايتام وعايزين حد يقرأ لهم او يكتب لهم الدروس على الكمبيوتر ، مثلا دار رسالة فيها مكفوفين محتاجين مساعده مننا
3-بص ياديدو عايزين نهتم بفئة مفيش كتير بيهتموا بيها فئة المسنين...عايزين نختار جميعات للمسنين ونعمل زياررات دورية للمقيمين فيها هنستفيد منهم كتير وتبقى حاجة جامدة بجد..و اننا لو عملنالهم مشاريع صغير يستغلوا فيها وقت فراغهم ويشعروا انهم نافعين لانفسهم وللمجتمع...وهكمل تحميل للافكار وابعتلك

Saturday, January 5, 2008

تخلف شعب مصر

مش عارف ايه التخلف الى الشعب فيه دا ؟
بقى يوم خسارة الاهلى هو الاكثر حزنا خلال العام الماضى ؟
و فى المركز الاخير يوم تزوير الاستفتاء على الدستور !!!
لو فعلا وصلنا لدرجة التخلف دى يبقى نستاهل الى بيجرالنا
!!!!



Friday, January 4, 2008

الامتحانات والضغط النفسواوى

مش عارف بقالنا 19 سنة بنمتحن وبرضة بنترعب من الامتحانات
لية مش عارف
ادعوووووووووووووووووووولى اوى عشان انا قلقان
ان ربنا ييسرلى كل صعب
بجد يا جماعة محتاج دعوتكم اوى
متنسونيش
وجزاكم الله خير