Saturday, May 19, 2007

اصدار امر توريد


كتير مننا بيحب حجات اوى ومبيحبش يفتقدها خالص


يعنى مثلا كلنا كل يوم اكيد بيحب يشوف والدة الصبح او أخوة او.... الخ ..
بس لما تكون بتحب الأكل ومبتحبش تفقدة خالص وبذات وقت المذاكرة

بس هل كلنا بيحب ياكل وهو بيذاكر .. دى بقه المشكلة الكبرى ..


ويسلام بقه لما تكون بتاكل وعمال تاكل ومحدش بيمنعك خالص..
لأن كلهم فى الوقت ده بيكونوا نايمين


يعنى مثلا انا من النوع اللى مبعرفش أذاكر إلا لما يكون فى أكل جمبى ..


احس ان فى حاجة نقصانى .. مبعرفش اركز خالص ..


المهم كان الوقت كدة الساعة 3.5 بليل لما حصلت المشكلة ..


كنت قاعد عادى بذاكر وكنت مخنوق اوى ..


عاوز اقترح على والدى انه ينقل مقر الثلاجة جمب المكتب بتاعى على طول ..


عشان كل شوية اروح واجى اروح واجى ..


وكمان عشان مقطعش حبل افكارى
ما هو حبل افكارى
وانا كده كل شوية بدل مذاكر مادة المشتريات والمخازن
عمال افكر يا ترى لو عندى مخزن ايه نوع الأكل اللى هيكون فيه
وهيخلص امتى عشان اقدر اصدر امر توريد ب الطلبية الجديدة ..
وهل هتيجى فى ميعدها..


قولت مش مهم ناضل يا واد يا محمد عشان مذكرتك وعشان تنجح..
وعشان تطلب من باباك انه بعد كدة ينقلك الثلاجة جمب المكتب
وميقولكش ان الأكل بيضيع وقتك
وتقدر تحسب ساعتها تكلفة تأخير الطلبية


وكلة ان شاء الله مكتوبلك فى الميزان..


المهم انا رايح على الثلاجة وجى من الثلاجة وطبعا كل انواع الأكل معايا ..


وفجأة حصلت المشكلة الكبرى اللى الواحد عمرة مكان يتوقعها فى وقت ذى ده ..


الثلاجة فضيت..


اة والله الثلاجة فضيت .


يعنى مفيش حاجة خالص
كدة لازك اصدر امر توريد بس فين المورد اللى هيكون صاحى دلوقتى


الاكل كله خلص ، الخضروات فنش، المية خلصت كمان ،


كل حاجة .... كل حاجة


. كنت مخنوق اوى مش عارف ازاى اتعامل مع الموقف دة وانا كدة فى نص تركيزى كده ..


المهم قررت انى أطلب اى حاجة تيكاوى فول طعمية كدة .. بس المصيبة بقه بفتح المحفظة ملقتش فلوس خالص..


فكر يا واد يا محمد هتعمل ايه .....هتعمل ايه .. ملقتش حل خالص


..طيب انا مبعرفش اذاكر ألا لو الأكل جمبى اعمل ايه ..


طبعا هتقولولى انى اروح انام ..


لأ طبعا أمل فين قاوم نفسك وشهواتك ..


قولت يا واد يا محمد بص انت لازم بقة تقاوم عشان تكون ..


منتا كده مش معقولة هتنجرف ناحية شهواتك ..
وكمان مش معقوله الطفاسة دى


بص انت تروح تتفرج على التليفزيون عشان تقاوم شهواتك ..


طبعا انا روحت اتفرجت على التليفزيون واول مفتحت التليفزيون كان على برنامج طهى ..


اة برنامج طهى الساعة 3.5 بليل مهو دة حظى ..


قفلت التليفزيون .. وقررت إنى أنتظر الفجر..عشان اصلى وأنام



بس المشكلة الكبرى بقه ..
هل كل الناس فعلا كده..ولا انا اللى غريب
ولا هو فى ايه ب الظبط
دة لو كلهم كده هتبقة مصيبة كبرى حلت على ارض الفصوليا قصدى الوطن
والسؤال الأخير اللى بيلح عليا كتير فى الوقت ده


هى تكلفة الطلبية الجديدة هتبقة تكلفة جارية ولا واقفة



ربنا يستر

16 comments:

Anonymous said...

الطفاسة واخدة حقها معاك كده0
اهدها كده وخش اتهبب ذاكر عشان كتر الاكل غلط للي في سنك وانا حاسس بيك لان كل مااقول بيني وبين نفسي لازم تربي نفسك وتعلمها الجهاد وقوة التحمل وتخفف الاكل عشان تبقي مجاهد بجد امي تعمل في نفس اليوم محشي او مسقعة باللحمة المفرومة يعني كده مفيش عزيمة ولاجهاد واحنا شباب بقييقة ومالنش لازمة لو معرفناش نقول لنفسنا كفاية0
عمك في الله عز

Anonymous said...

معلش يا حمادة حاولوا تكتبوا مواضيع جادة شوية عشان نتكلم في حاجة ليها لازمة بدل تهييس الامتحانات اللي انتم بتكتبوه ان كانت الامتحانات شغلاكم ممكن تكتبوا المواضيع الهادفة بعد الامتحان احسن من التهيييس ده0
عز

Nermien Hani said...

يااااااااااه يا محمد ده انت كده صعب اوي!!! ده انا ماما نفسها اني اكون ربعك بس

انا بقى مشكلتي انا مبكلش وانا بذاكر بحب اركز بس

يعني نظام ايام المذاكرة بخس كام كيلو كده بتبقى ايام مجاعة و طبعا ماما رايحة جاية تقوللي كلي يا بنتي و تجيبلي الاكل و شوية محايلة كده

يلا خير

انت ادعي ربنا انك تتعدي مني شوية عشان تخفف الاكل ده انت خلصت على تلاجة البيت يا اخي حرام عليك!!! و انا بردو اكل شويه و ربنا يهلهالي و اتخن شويه

ربنا معاك

بس السؤال حاليا المهم جدا: والدتك و والدك عملوا ايه لما صحيوا من النوم و لقوا التلاجة فاضية؟!! انا مش قادرة اتخيل الموقف

هههههههههههههه

بس بجد ضحكتني شكرا كنت محتاجة شوية الضحك دول

ربنا معانا كلنا يا رب

و شكرا على تشريفك البلوج بتاعي

خطــاب said...

ارحم يا دييجو يابنى
دانا الفترة دى نفسى مسدودة خالص و تقريبا مباكلش

mohamed said...

الطبيعي بتاعي وقت الامتحنات بكون كدااروح اجيب 25 رغيف فينو مع جبة جبن علي حلاوة وزتون والحاجات دي

واحطهم علي السرير وطول ما انا بذاكر اسحب واكل


بس السنة دي نفسي مش مفتوحه خالص

ومش عارف اركز لا في مذاكرة ولا في أكل

Anonymous said...

من حقك عليا ياحمادة النصيحة ركز في الاكل احسن وسيبك من المذاكرة والكلام اللي مش جايب همه انت في احدي مراحل النمو ولازم تشد حيلك عن كده شوية وليه جبنه وزيتون انا اقولك عن واحد بتاع كبدة واقف ادام الترعة اللي قدام المدينة راجل زي العسل0
عز

Rehab Saber said...

ماشاء الله

:D

cleopatra said...

مش عارفه اقول ايه .. مصدومه

انا اليومين اللي فاتو مكلتش فيهم خااااالص .. بس الحمد لله انهيت اضراب الطعام امبارح ..


بس حقيقي صدمتني .. كده مش هعرف اذاكر

كش ملك said...

انا مش عارف فعلا اتكلم

انا من مشاركتكم ميت من الضحك




طيب هبدء الاول بحبيب قلبى عز

ياجماعة عز ده بقه اللى عمال يتريق وزنة حوالى 100 كيلو من كتر الاكل ومبيشوفنيش الا لازم يقولى تعالى ناكل ..

ماشى يا عز لما اشوفك





اما انتى بقه يا نيو انا منصحكيش انك متكليش وقت الامتحان .. بصى وقت الامتحان دة لازم الواحد يربى نفسة على الاكل ويبدء يعمر المخيخ عشان يعرف يركز .. لازم تكلى يعنى ممكن تجيبى بطيخة كاملة قطعيها وحطيها جمبك وانتى بتذكرى وزوقى منها كل شوية او لو مبتحبيش البطيخ ممكن تحطى اى حاجة .. بس لازم تحطى حاجة عشان تركزى .. دى نصيحة قبل النوم ..

وجزاكى الله خير على مرورك ومدونتك فعلا رائعة وانا بتبعها بس مش بعرف اعقب ازاى حجات كتيييير بتظهرى مش فاهم حاجة .. يلا الحمد لله







حبيب قلبى خطاب مش انت لسه قايل التنين الحراق .. عاوز تجوع بعدة

اكيد كلتة كله فعشان كدة مش جعان ..




25 سندوتش يانهاااااااااااااااااار يامحمد


انا اة اكل بس مش 25 سندوتش يعنى 30 ، 40 كدة .. اشطا عليك يا ريس انا كدة هدخلك الفريق بتاعى ..


فريق كل ودلع نفسك







جزاكى الله خير على مرورك يا اربيين ..





ليه كدة اضراب لية عن الطعام .. انا شايف المواد سهلة خالص والدكاترة بيدونا الامتحانات وكل حاجة تمام.. والدنيا بديع والجو ربيع وقفلى بقه على كل المواضيع

لحسن الدنيا فيها لبش شوية

وانا بخاف



جزاكى الله خير على مرورك

Nermien Hani said...

يا ربي!

30و 40 ساندوتش!!!!

لييييييييييييييييييييييه؟
في مجاعة طول السنة؟

انا اعرف ان الصبيان بياكلوا كتير بس مش للدرجادي يعني؟ ده انت على كده تخين اوي!!!!

ربنا معاك و شكرا عالنصيحة بس فعلا اللي في كليتنا دي لازم يخس, يعني لما تكون قاعد بتذاكر هستولوجي مش هيجيلك نفس تعمل حاجة اصلا... او لو بيو برده هتسد نفسك, اما بقى لو اناتومي او فسيولوجي فدول محتاجين تركيز هركز في الاكل ولا المذاكرة اكيد في المذاكرة هي اللي هتنفعني

و بعدين انت بتاكل جبنة و زيتون و حاجات كده انا الاكلات دي اصلا مش بحبها انا اخري مربى و حلاوة و صراحة ممكن اكون جعانة و اكسل اقوم اجيب حاجة اكلها

دايما بقول يعني لو مصر جت عليها مجاعة هنعيش ازاي فبدرب نفسي من دلوقتي (شوف التفاؤل) انما انتم الله يكون في عونكم ساعتها

ربنا يهديك و تبقى زيي كده و تركز في المذاكرة شوية يابني الاكل مش هيطير و محدش هياكل اكلك انما المتحان ليه وقت محدد

و على فكرة في المدونة تعلق عادي زي هنا اكتب الusername & password و هتلاقي صورة عليها حروف و ارقام وتحتها input box اكتبهم فيها و بعدين publish بس مفيش اسهل من كده

بس بجد موضوعك ظريف بيقلل الاكتئاب بس مقلتليش عملوا ايه في البيت لما صحيوا لقوا التلاجة فاضية!!!!!

Rehab Saber said...

حسانى شبعت من الكلام بجد

اصلا..الواحد ايام الامتحانات مبياكل خالص الا قليل جدا وبالعافية يعنى


مش بحسد :D

محمد said...

تقريبا أيام الامتحانات كله بيكون كده

ربنا يعينك عليها :)

منة الله said...

ياااه

انا بقى كل فترة امتحانات

لازم لازم اعمل دايت

مش ببقى قاصدة

بس مبفتكرش الدايت غير قبل الامتحان

و طبعا ببقى نفسي في الاكل

بس ناس غاوية عذاب بقى

:D

عايزة اقلك على حاجة في المشتريات

لو مكنش معاك الملزمة النهائية او حتى لو كانت معاك

بص في الامتحانات السابقة لانها في العادة بتبققى طويلة

و ربنا معاكم

كش ملك said...

جزاكى الله خير يا نيو ..
انا مش لدرجة دى والله وانا والله رفيع اوى اوى .. بس انا كنت بهزر مش باكل طبعا 30 40 انا كنت بهزر ...بس فعلا الأكل حاجة مهمة عندى اوى بس وقت الأمتحانات بس بعد كدة والله والدى بيتخانق معايا عشان اكل .. بس يلا ربنا يستر فعلا الواحد عاوز يدرب نفسة على المجاعة ولا يدرب نفسة لية مهو اصلا فى مجاعة ..


وهو المذكرة اثرت عليكى ايه الأسامى دى فسيولجى .. ولا سمعنا عنه فى طبق اليوم .. ربنا فعلا يقويك على الامتحانات والمواد

بصى هو والدى متكلمش معايا بس الوقت اللى هو صحى فيه كنت بذاكر فكان مبسوط لما دخل على الثلاجة وملاقاش حاجة خالص جه فبيقولى هو التتار هجم على الثلاجة قولتلة لأ يابابا انتا عارف بقه اوقات امتحانات والواحد بيكون جعان .. قالى اة معاك واحد جعان مش 20 جعانين .. بس ودخل نام .. الحمد لله محصلش حاجة تانية ..
شكرا على مرورك..


بالعكس يا ايبين انا اعرف ان الواحد مبيكلش الا فى الأمتحانات عشان مبيطقش المذكرة فبيتلكك ب الأكل ..
جزاكى الله خير على مرورك وانا طبعا متأكد انك مبتحسديش..





ربنا يسمع منك يا وضاح وجزاك الله خير على مرورك




جزاكى الله خير على النصيحة يا منة .. بس يعنى ايه طويلة .. هو انا فعلا بصيت وهو شوية اسئلة متكررة وشوية لسه بشوفها ادعيلى بس .. جزاكى الله خير

Anonymous said...

طويلة يعني الي مش بيبقى باصص في الامتحانات السابقة

بيخرج من الامتحان يقول الوقت مكفاش

لانو هوا عارف يحل كل الاسئلة

بس ايدو مش واخدة على الحل بسرعة

و في المشتريات النظام ده مينفعش

فبص بقى على الامتحانات و حل لو واحد حتى بالورقة و القلم

علشان تحسب لنفسك الوقت و متتزنقش في الامتحان

Nermien Hani said...

physiology يعني علم وظايف الأعضاء و هي دي المادة اللي عندي فيها امتحان اليومين الجايين دول ادعولي بس

Anatomy طبعا يعني تشريح معروفه دي

Biochemistry الكيمياء الحيوية

Histology علم الأنسجة

يلا عشان محدش يقول حرمتكم من حاجة

و بعدين انت بتتريق على فسيولوجي وانتوا عندكوا اسامي عجيبة مشتريات و مراجعة و بحوث عمليات و ضرايب ايه ده كله!!!!

ربنا معاكوا يا رب و مع طلبة المسلمين جميعا. ادعولنا بس