Wednesday, April 25, 2007

ممنوع الدقن يا كابتن


يقول محمد : هى الدقن بدعة صح ؟؟

**************

يقول محمد : ذهبت الى معهد القوات المسلحة للغات لدفع مصاريف كورس اللغة الانجليزية.. اتجهت الى البوابة فاذا بالجندى على الباب يمنعنى من الدخول ..
الجندى : رايح فين
محمد: داخل ادفع فلوس الكورس
الجندى: مينفعش
محمد: هو ايه الى مينفعش ؟؟ ليه ان شاء الله
الجندى: لانك ملتحى و ممنوع يكون عندنا طلبة ملتحين
محمد: و الله ؟؟ طب هاتلى حد اكلمه
الجندى: تعال قابل العميد محمد
و هكذا اتجها لغرفة العميد محمد الذى لم يكن متواجدا فى ذلك الوقت و انتظره محمد ردحا من الزمن الا انه لم يأتى
تذكر محمد انه يعرف عميد يدعى اسامة بالمعهد فطلب كارت زيارة ليقابله و يتفاهم معه
و لكنه لم يجد العميد اسامة ايضا فعاد للأمن مرة اخرى
محمد : ملقيتوش برضه
الامن: بص انت تعمل الاتى :.. تروح الكافيتريا هتلاقى مكنة حلاقة خدها و شد دقنك
محمد: انت بتهرج ولا بتهزر ؟؟
الجندى: انا مش بهزر قبل الساعة 3 العصر
محمد: يا راجل ؟ طب انا هطلع استناه
الا ان مكان دفع المصاريف كان قريب من حجرة العميد اسامة فاتجه محمد الى هناك للدفع
محمد: عايز ادفع المصاريف
الموظفة: لا مينفعش
محمد: ليه يعنى
الموظفة: مينفعش الملتحين يدفعو الفلوس
محمد: ملتحى مين انا مش ملتحى دى موضة انا بقلد ريكى مارتن عارفاه ؟
الموظفة: اه اه طبعا .. هى از ماى فيفريت .. كوووووول فانكى جاى هيم
و هكذا تم دفع المصاريف بنجاح بعد ان اثبت محمد انه لا يتشبه بالرسول بل كان تشبهه بريكى مارتن المؤمن المجاهد
حقا انها دولة اسلامية ترعى قيم الدين الحنيف
بقى ان نذكر ان محمد لم يكن ملتحيا بشكل كامل بل ترك ذقنه لبضعة ايام فقط

و كش ملك

31 comments:

mohamed said...

المشكلة الكبرى أصلا يا خطاب أن ريكن مارتن أصلا مش مربى ذقنة .. وهى متعرفش أصلا ريكن مارتن لإنها لو كانت تعرفة كانت قالتلى اة مش مربى ذقنة ..


بس يلا دى بلد كوسة ..

على فكرة انا مكنتش أعرف حد هناك أسمة العميد أسامة ..

انا كنت بألف علشان أدخل ..

هههههههههههههههههه

Anonymous said...

يـــــــا حــــــــــــلاوة

نفسي أعرف هنوصل لحد فين في البلد ديه .. بجد كفاااااااااااااايه .. والله حرام عليهم ..

انا هضرب مثل بسيط جدا .. ان بره ممكن البنت تشتغل في اي مكان بالحجاب .. حتي الفنادق .. بالحجاب .. وبيحترموها وبيحترمو دماغها وعقليتها .. وفوق ده كلو بيعتبرو اللي ( جوا ) دماغها مش اللي ( فوق ) دماغها .. في حاله ان هنا في مصر اي فندق بيشترط عدم الحجاب ..


بجد حاجه تقرف ..

كمان محمد كان الموضوع بالنسبالو بسيط .. دفع مصاريف .. انا والله واحد جاري اتمسك أمن دوله 3 ايام بسبب أنو أطلق لحيته وكان بيقرأ قرأن علي السطح .. يعني بجد الحمد لله


cleopatra89

بن توفيق said...

اه طبعا انت بتتكلم في ايه ؟

ريكى مارتن هذا المجاهد المناضل الذى سيتجمع حوله الناس يوم القيامة سيشفع لمحمد لانه قلده واتبع موضته

حسبى الله ونعم الوكيل

sharkawoo said...

يا جاااااااااااامد

ريكي مارتن يا محمد يا الراجل طيب ...

طيب لما اشوفك .. يا فقري ...

بص يا سيدي هي لو جت علي الذقن كنت قولت ماشي ... المشكلة في حاجات كثيرة اوي ...


إذا كان هذا تعالمنا بالظاهر فما بالكم بالداخل ...

ربنا يسرها معانا

وضـّاح said...

السلام عليكم

سبحان الله

هذا الموضوع حصل مع والدي كان معزوم في فرح .. فعمل مشكلة معاهم وفي الآخر بعد ما قائد الحرس خرج واعتذرله .. قاله ممكن أدخل ولكن في حالة واحدة وهي إنك تشيل اللوحة المكتوب عليها المنع طبعا رفض فوالدي قاله وأنا لايشرفني دخول مكان مثل هذا

وحصلت معايا وأنا بخلص ورق الجيش الأخ الكريم العسكري رفض تسليم الورق لي إلا بعد حلق لحيتي وفعلا حلقتها ودي كانت أول مرة أحلقها من سنين .. ويبدو أن الموقف يتكرر معي هذه الأيام

ربنا يتولانا

shab masry said...

لو كانوا فاكرين بكده انهم بيرهوبنا... ولا ورب الكعبة هما يزيدونا تمسكاً اكثر بديننا ومظاهرنا الاسلامية واولها اللحية والحجاب..

كنت مرة ذاهب مع امي لمستشفى القوات المسلحة الي في المعادي لزياة ابن خالي هناك.. وهي منقبة.. الراجل بتاع الامن كان عايز يمنعنا من الدخول.. بس الحمد لله خالي (هو عميداصلاً في الجيش) ووالدي ظبطوه ودخلنا ساعتها

حسبنا الله ونعم الوكيل.. وبرضه هفضل مربي لحيتي وليفعلوا ما يشائوا باذن الله تعالى

وانا اقرا المقال تذكرت قول الله عزوجل "ذلك بانهم لا يصيبهم ظمأ ولا نصب ولا مخمصة في سبيل الله ولا يطاون موطئاً يغيط الكفار الا كتب لهم به عمل صالح"

نسال الله ان يكون ما نفعله اغاظة للكفار ولنتحسب كل اذى يصيبنا باذن الله تعالى فهو والله اجره عند الله عظيم

Kad0o0ora said...

اللهم انا لا نسئلك رد القضااء ولكن نسألك اللطف فيييه

Abdo Saleh

ASADMASGON said...

ربنا يكون معاك المشكله انت في بلدك وبيتعمل فيك كده ملو في بلد تانيه ايه اللي هيحصل فيك

AmR said...

طب مهو ده الطبيعي
إنت مستغرب ليه :D

Arabian GiRl said...

ايه الارف ده !!

يلا عقبال ميمسكو اللى لابسين شراب ابيض ويكولو ممنوع

امام الجيل said...

حسبنا الله ونعم الوكيل الناس دول زودوها اوى دى احد خطواتهم فى محو اسلامية البلد وفرض العلمانية زى ما عايزين يعنى بس ابدا لن يكون لان الحمد لله الاسلام فى قلوب الناس مهما كانوا بعيدين عنه تطبيقا بس الحمد لله الناس مقبلة على الاسلام وكل مظاهره ومازالوا يستنكرون كل مظاهر الانحلال حتى لو بيعملوها

mohamed said...

كنت هقولك ركي مارتن طلعه دقن امتي اصلا

ربنا يعفينا جميعاً

mohamed said...

اة منا قولت يا محمد ريكن مارتن أصلا معندهوش دقن ..

وهى أصلا كمان متعرفش .. بس المهم انى مكنش بتشبة ب الرسول صلى الله علية وسلم ..

وفعلا دى مش حاجة جديدة ..

دى موجودة أصلا ..

ربنا يستر بقة لما أروح المرة الجاية وهتكون دقنى كبيرة ..

هعمل اية بأة ..

أكيد مش هقولهم أنى بتشبة ب جيفارا ..

ربنا يستر ..
د


أدعولى

koukawy said...

هههههههههههه
طب ايه علاقة الدقن بالدراسه دي ناس مخها ضيق اوي

frEE !Sl@m oOo said...

انا مش لاقى كلام اقوله لكن اقولك لك يا اخى اصبر ما زال الطريق طويل وغدا سيكون ممنو ع الحجاب وممنو ع المشى بالمصحف فى الشوارع ومن الممكن تنفيذ رغبة المخرج يوسف ليش شاهين بان يتك لاغى الاذان كما قال فى احدى المجلات وحسبى الله ونعم الوكيل

بيتو said...

حسبنا الله ونعم الوكيل

هذا هو الواقع الاليم

محمود سعيد said...

طيب والله كويس أنهم صدقوه :-)

Omar Elgarhy said...

انت ياد قلتلها انا مربيها زى ريدي مارتن :d


يا سيدي

بجد والله ممكن اى واحد بذكاء يعدى من اتخنها موقف

mohamed said...

جزاكم الله خير على تعليقتكم ..

وحسبى الله ونعمة الوكيل وربنا يستر بقة المرة الجاية

Neo said...

انا اول ما قريت الموضوع قلت ايه ده؟ بجد ده؟ بس خطاب قاللي ده بجد فعلا!!!!

انا اعرف انهم هايفين ب مش للدرجادي!!!
و خلاص يا محمد عوضك على الله ابقى قلهم كل مرة ريكي مارتن هتعمل ايه؟!!!!!

المجاهدة said...

للأسف بقى هوا ده الطبيعي...

مم

بس والله هما اغبيا

هما بيقعدوا يعملوا كده... عشان يعني يخوفوا الناس و يخلوهم مايحبوش الدين ولا التدين ولا تنفيذ تعاليم الدين


بالهبل بتاعهم ده.. الناس بتتمسك اكتر بالدين
لأنهم بيكونوا بيدافعوا عن فكرة.. و كل ما حد يزق اكتر و يضيق عليهم اكتر... طبيعة النفس البشرية انها هتزاد اكتر تمسكاً بالي هيا عاوزاه..


خيراً ...
ألا ان نصر الله قريب

mohamed said...

جزاك الله خير يا نيو على تعليقك .. انا فعلا كل مرة هعمل كدة بس المشكلة معرفش حد تانى غير ريكن مرتن .. يلا هحاول اعرف حد تانى ..






جزاك الله خير يا أخت مجاهدة .. وفعلا هما كدة بس مش كل الناس بتثبت على دينهم .. أو على الاقل يجاهدوا من أجل كدة .. فى البعض بيقف ضد دة والبعض التانى بيخاف ويتراجع ودة لازم يكون موجود ..



يلا الحمد لله

Maha said...

حسبنا الله ونعم الوكيل

يا مراكبي said...

أخبر رسول الله صلى الله عليه وسلم عن أنه سيأتي زمان يكون فيه القابض على دينه كالقابض على جمرة من نار

ده أولا

أما ثانيا .. فده الفكر المتخلف بتاع حكوماتنا الذكية .. يعني من إمتى اللحية كانت شعار المسلمين لوحدهم؟ ماهو الباشمهندس لينين كان عنده لحية .. وكارل ماركس .. وغيرهم

حاجة تقرف

mohamed said...

والله فعلا يامراكبى ومش كدة وبس ..

انت عندك البابا نفسة لحيتة كبيرة اوى ..

أش معنا بقة ..


يلا الحمد لله

Neo said...

عندك حق يا محمد كل رجال الدين ملتحين ده يمكن المسلمين اخفهم اشمعنى صحيح؟

و ممكن تقولها ايمينم و اسامي مكلكعة كده متفهمش منها حاجة

هههه ربنا معاكم الحمد لله اني بنت

عصفور المدينة said...

أخي جزاك الله خيرا ابقى حفظني أسماء كام واحد من دول
انا اشتريت سيارة من عميد جيش ورحت اطلع شهادة مخالفات من المرور بتاعهم ما رضيوش يدخلوني
بس سلكت نفسي بالألاطة وكلمتهم من طراطيف مناخيري

DeadinLife said...
This comment has been removed by a blog administrator.
Neo said...

احلى حاجة عيش لهم في دور السينيما الهندي عشان ميفهموش حاجة خالص

امثال شهروخ خان
هريثيك روشان
اميتاب باتشان
ابهيثيك باتشان

انطقوهم صح متفضحوناش

:D

eldoctor said...

بكره يمنعوا اى حد اسمه محمد من دخول اى حتة . ولو لسنك اسامة تبقى ارهابى .. ولو ايمن يبقى تبع القاعدة ... ... لسه ياما نشوف

Abo Salah said...

هههههههه .. ضحكتني اوي القصة
ربنا يصلح حال البلد