Friday, March 23, 2007

أنســى أحسن !!

البداية كانت من هنا .. فى مرة كنت قاعد مع والدى .. فكنا بنسمع ألى حصل فى مجلس الشعب من فبركة التعديلات الدستورية .. فقالى بكل بساطة .. يابنى أنت إن شاء الله أول متخلص تسافر برة على طول

فقالى انك فى مصر مش هتعرف تعيش بعد ألى حصل فيها .. يابنى أمشى أحسن وسيبك من مصر ..

انا مكنتش عارف أرد علية أقولة ايه .. مش عارف هل أرد الرد المفروض ان الواحد بيقولة .. لأ انا مصرى ومش هخرج برة مصر .. حسيت انها شعارات بنرددها وخلاص .. انا كنت تعبان اوى أمبارح .. كنت حاسس انى نفسى مرة فى حياتى أحس انى نايم وانا مش شايل هم حاجة .. مش عارف كنت عاوز أقولة لو انا سفرت وكذا شب ساب بلدة وسافر ميين هيحررها من النظام الفاسد مين يقف ضد النظام ويقول لأ .. ...مين

انا يمكن أتأخرت اوى فى أخر كتابات لى على البلوج .. بس كان بسبب ضيق نفسى .. كنت حاسس انى مخنوق أوى وتعبان .. كان نفسى أدخل أكتب فى البلوج بس مش عارف لية بعدت ..

نفسى فى يوم أصحى بقة من النوم واحس ان كل ألى بيحصل دة مجرد حلم .. حلم ..

وأن التعديلات الدستورية دى مجرد حلم ..

انا مشتت مش عارف أكتب .. حاسس بحجات كدة غريبة .. هل الناس بتمر بحجات ذى دى .. وبيحسوا انهم فى مرة بيتكلموا وبيكتبوا حجات مبتتفهمش .. أنا مشكلتى أن محدش بيفهمنى ..

حاسس انى فى وادى والعالم كلة فى وادى تانى خالص .. كلمت ناس كتير عن التعديلات ,الى ممكن يحصلنا منها .. وكان الرد أنى مجنون ..

مش عارف أمتى هنفضل فى السلبية دى .. مش عارف أمتى بقة هصحى من الحلم ألى انا فية دة .. انا متأكد ان مفيش تعديلات دستورية .. وأن بلادنا بطبق الشريعة الإسلامية .. وأن مفيش أعتقلات خالص .. وأن الناس كلها أغنية .. مفيش فقراء .. مفيش محتجيين .. مفيش حرب فى فلسطين ولا الشيشان ولا أفغانستان ولا فى أى بلد عربية ..

أحنا فى سلام

أكيد كل دة كان حلم .. حلم بيراود كل أنسان .. حلم بنشوفة وأحنا نايمين .. أنا مش عارف حد فاهمنى ولا بردة لسة بكلم نفسى .. هل فعلا انا فى وادى والعالم كلة فى وادى ..

أنا أول مرة فى حياتى معرفش أتكلم او انى أكتب خالص .. حاسس بإن العالم غريب اوى .. ناس بتجرى للقمة العيش .. وناس بتجرى لحبها فى السلطة .. وناس غلابانة ملهاش ولا فى الطور ولا البرسيم .. وناس بتناضل من أجل حريتها .. وشباب ضايع ميعرفشس اى حاجة فى أى حاجة ..

انا نفسى مش فاهم حاجة .. انا بكتب علشان عاوز أكتب .. علشان عاوز أفضفص .. بس أزاى مش عارف .. أزاى أوصل مش عارف ..

من يومين كدة كنت بكلم واحد صحبى بردة والدة فى السجن .. كنت عمال أكلمة أمبارح عن البلد أصلى كنت بردة أمبارح تعبان .. شكلى كدة هفضل تعبان ..

فكان هو كمان تعبان .. اصل باباة أتاخد فأكييد زعلان ..

مش عارف بأيت أخاف أنى أكلم حد أو أفضفض معاة لحسن يكون هو كمان تعبان ويشيل هم على هم .. هو دة كان سبب عدم دخولى البلوج .. كنت خايف انى أخنق حد تانى .. ولا مهى باينة من البلوجات الكل تعبان .

أمتى هترجع تانى يازمان .. أمتى ؟؟؟


أنا أسف لو كان الهم زاد عندكم ..أقولكم أكنى مكتبتش حاجة ..
المفروض ان دة كان أخر كلامى .. وكنت خلاص عرضت البوست .. بس فى واحد كنت بكلمة على الماسينجر وكنت بحكيلة .. فرد عليا .. وقال لى حاجة واحدة بس ..
أقرء ألى على الصورة دى ..
انا فعلا كنت خلاص هحس بيأس بس أقرء كدة الكلام دة .. هتحس براحة قوى .
يمكن دى الحاجة الوحيدة ألى الواحد ممكن يطلع بيها من الكلام دة كلة ..

..


8 comments:

يعقــــوب .... said...

أنا أبوبا قاللى نفس الكلام بتاعك ده و كان رأيي نفس رأيك كده بس مطولتش معاه و مشيت بره البلد بس مشيت عشان أعرف أعيش و أفكر على روقان...و عمموما متزعلش قوي ..ياما مرت على مصر سنين أسوأ من ده 1000000 مرة و ربنا بيفرجها برحمته

عمر عاشق القرآن said...

لا متنساش !!!!

لازم نفضل فاكرين

لازم نفضل فاكرين اننا أصحاب البلد دى و اننا أهلها و ان خيرها كله لينا

لازم نفضل فاكرين ان من حقنا نتكلم و من حقنا كمان ان كلامنا يتسمع ويتنفذ

لازم نفضل فاكرين مين اللى باع البلد و مين اللى نهبها و مين اللى حرمنا من خيرها

أوعى تنسى
أنا بحاول أفضل فاكر

وفعلا اليأس ليس من أخلاق المؤمنين
رحم الله البنا و رحم من سار على طريقته

Anonymous said...

كلامك صح و الناس كلها حاسساه بس محدش عارف يعمل ايه؟

لإمتى هنفضل كل اللي نعمله اننا نتفرج و ندعي؟
هو ده دورنا؟
اكيد لازم نعمل حاجة بس هي ايه؟
No body knows or maybe no body wants to know

3araby said...

خلاص انتهت مصر .

خلاص مات دستور 71 بجمال مواده , وننتظر دستور جديد بمواد جديدة أحسن منه , والله أعلم هيكون امتى .


للاسف البلد دى بقت مش احسن من غيرها .

كش ملك said...

جزاك الله خير يا أخ يعقوب وأنا كنت كل مرة بتمنى ان والدى يكون أحدى الباحثين عن الحرية ولكن الحمد لله على كل شئ ..



جزاك الله خير يا مشروع بطل .. والله كلامك أثر فيا اوى وفعلا انا معاك مش هنسى خالص ومش هنسى ان دى مصر .. وإنها بلدنا ولازم نحافظ عليها مهما كلفنا الامر .. كلامك جميل اوى بجد جزاك الله خير



جزاك الله خير يا نيو .. ورد عليك بسيط جدا هو ان الله لا يغير ما بقوما حتى يغيروا ما بإنفسهم ..
لازم نغير نفسنا ونغير شعبنا فى نفس الوقت .. كل واحد مننا على ثغرة من الأسلام كما قال الرسول صلى الله علية وسلم ..


جزاك الله خير يا عربى.. وانا مش معاك دستور 71 هيعود تانى ذى معاد دستور 23 أيام توفيق نسيم .. 18 نوفمبر أكيد كلنا عرفين اليوم دة يوم الطالب العالمي ناس أستشهدت من أجل إعادة الدستور .. وعلشان يعود الدستور لازم حد يروح شهيد من أجلة ولكن من سوف يختارة الله لهذا ..




وفى الأخر انا بشكركم كلكم بجد دخولكم البوست فعلا أثر علي وغيرنى من اليأس الى الأمل .. وجزاكم الله خير ..

بس فى النهاية أقولها من كل قلبى الى الإمام الشهيد حسن البنا رحمة الله .. جزاك الله كل خير .. وإنى أحبك فى الله

Rehab Saber said...

البلد دى بتاعتنا

هم صحيح بيقولو مصر لمن حكمها بس احنا بنقول مصر لشعبها

اللهم انا مظلومين فانتصر

Anonymous said...

كلامك صح يا ارابيان جيرل





)اناااا(

كش ملك said...

جزاك الله خير على مرورك يا أربين وفعلا مصر لشعبها وهما ألى هيخدوا القرار فى الأخر لأما الخضوع والذل لأما الكرامة



جزاك الله خير يا أنا على مرورك