Wednesday, July 4, 2007

صراخ كثير


عندى سؤال !!
ليه امبارح بين الساعة التاسعة و الثانية عشرة تقريبا كنت بسمع اصوات صراخ من الشارع على فترات متقطعة ؟؟
لو حد يعرف يا ريت يقولى
و لو محدش يعرف هقولكم انا
----------------



ان يكون اليوم مباراة كرة بين الاهلى و الزمالك فان هذا يعنى انه يوم عيد للكرة المصرية
فينتشر بائعى الاعلام و الرايات البيضاء و الحمراء فى الشوارع
و ترى السيارات ترفع هذه الاعلام فى مشهد مهيب كرمز للانتماء القوى
و يبدأ الزحف من كل حدب و صوب الى استاد القاهرة ليمتلىء بما يقارب المائة الف ربما قبل المباراة بساعات
و لابد بالطبع ان يتم فصل الاهلاوية عن الزملكاوية حتى لا يفتكوا ببعضهم البعض هؤلاء فى جانب بلون و راية و هؤلاء فى جانب بلون و راية .
و يبدأ زحف اخر على المقاهى لتمتلىء بالمشاهدين..يترقبون بدأ المباراة فى شغف
تبدأ المباراة و تتسع معها العيون فى متابعة قلقة مع الكثير من الصيحات و الشتائم عند ضياع فرصة او احتساب فاول او احراز هدف
اذا فهذا هو التفسير المنطقى للصراخ الشبيه بصراخ النساء الذى كنت اسمعه على فترات
و هكذا يشعر جماهير الفريق الفائز بنشوة الفوز فلابد من الصياح و التهليل و التفاخر بامجاد فريقهم
بينما يشعر جماهير النادى الاخر بمرارة الهزيمة
و اذا فتحت الماسنجر تجد عددا لا بأس به من الاسماء المستعارة قد تغيرت لتغطى الحدث و تشيد بأمجاد البطل
و لا بأس بأن يذهب الطلبة للجامعات حاملين اعلاما ضخمة بلون فريقهم .
و لا بأس بالطبع من ملايين المناقشات التى تغطى كل جوانب المباراة و حتى ادق التفاصيل

طيب تعالو نحكى قصة كدة و نرجع لموضوعنا
بيقولك مرة مدينة ما كانت عايزة تغزو مدينة تانية..بس المدينة التانية كانت اسوارها قوية و منيعة ففشلت كل محاولات الغزو..لحد ما الجيش الغازى ابتكر حيلة..نشر سؤال بسيط فى البلد "ايهما خلق اولا البيضة ام الدجاجة؟" سؤال محير بس مش هتفكر فيه اكتر من دقيقة بغرض الفضول او التسلية و بعدين تكبر دماغك.
شعب البلد دى بقى دخل دماغهم الفاضية التساؤل دا قوى..و قعدوا يفكروا و يجيبو فى براهين و اثباتات و كل واحد يجيب دلائل تدعم رأيه و انقسموا فريقين .. فريق البيضة و فريق الفرخة..لحد ما بقى دا شغلهم الشاغل فقدر الجيش المعتدى غزوهم بسهولة .
حد فهم حاجة ؟؟

دعونا نتفق على ااننى لا اهاجم اشخاصا بعينهم و لا افضل نفسى على احد..بل اننى ارصد ظاهرة و احداث فلا داعى لشخصنة الحوار.
انا لا انكر على احد مشاهدة مباريات الكرة فأناا احب الكرة .. ولا انكر على احد مشاهدة مباراة الاهلى و الزمالك
و لكن ضع الامور فى مقامها
نحن نشاهد الكرة للتسلية و لتمضية وقت ممتع
و لكن ليس هذا ما يحدث ابدا .. لو كانت مجرد تسلية لما سمعنا هذا الصراخ الهستيرى
ان هذا الذى يصرخ فرحا بنصر فريق كرة فشل فى ان يحقق نصرا فى حياته
و هذا الذى يسب الحكم الظالم ... فشل فى ان يتكلم بظلم حاكمه
و هذا الذى يكره الفريق المنافس "فريق كرة و الله مش كتيبة من اليهود" لم يشغل باله بمعرفه عدوه الحقيقى
و هذا المهندس الذى مات بالسكتة القلبية اثناء المباراة .. اعتقد انه لو كان مات بالسكتة القلبية لخبر سمعه عن العراق او فلسطين لمات شهيدا

يا عم سيب الشعب المطحون يرفه عن نفسه :
هل رفع علم فريق كرة و التشجيع الجنونى له و السباب القذر و شق الجيوب و الفرحة الطاغية بالنصر و الحزن القاتل للهزيمة ترويح عن النفس ؟؟ الصحابة كانوا ارق منا حالا و لكنهم كانوا يفرحوا لما يستأهل الفرح و يحزنوا لما يستأهل الحزن
ما يحدث هذا ليس ترويح عن النفس .. بل هروب و دفن رأس فى الرمال
الكرة وسيلة من وسائل الهاء الشعب . و هذا مقصود .. هل لاحظت التغطية الاعلامية الضخمة لاحداث الكرة ؟ هل لاحظت حضور رئيس الجمهورية لبعض المباريات ؟ (احدها كان بعد غرق العبارة بساعات)
و من الطبيعى جدا ان يتقاضى لاعب الاهلى 40 الف جنيه من اجل مباراة فى حين يتضور الشعب جوعا
عالم يتقاضى ملاليم و لاعب خريج صنايع يتقاضى ملايين !!
ولا اعجب اذا ما تحول مفهوم الوحدة الوطنية المزعومة من مسلمين و اقباط الى اهلاوية و زملكاوية
فاعجب لمن يتشدقون باهمية توحد المسلمين و عدم تفرقهم الى جماعات فى حين انه يسب مشجعى النادى الاخر و ينظر لهم نظرة الكراهية ( و هذا حقيقى و ان كنت لا تصدق طالع منتديات الاندية)
اذكر ذات مرة اضافنى احد اصدقائى فى محادثة ماسنجر مع بعض الشباب من الاسماعيلية و هؤلاء معروف عنهم كراهية الاهلى.. فكنت امزح قائلا فلان اهلاوى مما كان يثير حفيظتهم و اخذوا يتسائلون مين دا الى اهلاوى و كاننى قلت ان بيننا يهودى او كافر .. فحينما صارحتم بان الاهلاوية ليسوا يهودا كان الرد المنطقى بان اليهود افضل منهم
اعلم بان هذه حالة متقدمة و لكنها موجودة و بدرجات متفاوتة
و مما يثير العجب ان يتفاخر احدهم بانه زملكاوى متعصب و اذا كلمته عن الاسلام قال : بلاش تعصب
تعصب لفريق كرة و تساهل فى الدين
هنا اتسائل اين وصل مقام الكرة عندنا ؟؟؟
اعتقد اننا لا نستحق شرف تحرير الاقصى مادام شبابنا يرقص فى الشوارع ابتهاجا بماتش كرة .

شاهدوا الكرة و لكن ضعوها فى مقامها الطبيعى

اقرأ ايضا :
جووون يا خبر ابيض جون يا جماعة
(بالمناسبة البوست القديم دا كنت نشرته فى احد منتديات الاندية فالموضوع اتقفل و كان من ضمن الردود من اتهمنى بانى استغل الدين من اجل اهداف اخرى و من طالب بحذف اللنك لانه يحتوى على هجوم صريح على النادى
خطــاب
------------------
اولا انا هتكلم عن حاجة صغيرة ..
الموضوع انى مش بقف ضد تشجيع الاهلى او الزمالك ب العكس انا شوفت الماتش زى اى حد بس ..
لما شوفت الماتش عند واحد صاحبى فكان كل ميدخل جون للنادى الزمالك يطلع واحد من الشباك يقعد يسب فى النادى الاهلى والاهلاوية والله بجد وبعدين الموضوع ده اتكرر فى كل جون سواء من الاهلى او من الزمالك يطلع واحد من الاهلى يسب فى الزمالك بعد دخول الجون .. فى الاخر بعد فوز الاهلى قولت اخرج اتمشى شوية بعد اللى حصل ..
وانا ماشى كدة على فيصل شوفت صريخ كتييييييير فستغربت فسألت .. فقالولى
جماهيير الاهلى بيفرحوا ب الفوز
انا والله صعبوا عليا فى الاول قولت ياااه على الشعب مبيصدق يخرج يفرح بسبب الكبت الى هو فية
بس شوية وشوفت شباب بيجروا فبعديها وقفوا امام عربية فيها بنات
فكادوا انهم يخرجوهم لولا ان البنت اسرعت ب العربية
وكان هذا هو التعبير عن الفوز ..
الذى استطيع ان اعبر عنه ب ثلاث جمل
اعراض الفوز .. سب دين .. تحرش جنسى .. الفاظ قذرة
انا الاول كنت ضد خطاب بس الواحد لما شاف بعنية الحاجات اتغيرت كتير اوى
تعال بقه نقولهم نتجمع عشان فلسطين .. يا عم فلسطين ايه بلا نيلة
وتحيا مصر
محـمـــد

29 comments:

عمر الشرقاوى said...

خير انشاء الله خيير اطمن الصراخ دا مفيش حاجه دا اتوبيس بس بتاع شرم اتقلب بالعمال معلش ياراجل الحمد لله اشرب بقه شويه ميه بسكر وتعاللنا يلا اسكندريا مستنينك يامحمد انته وخطاب

حراس الحقيقة said...

لا تعليق
:S

Anonymous said...

عشان السبع اجوان
عز

بحب الحق said...

طلع ايه الموضوع فى الاخر؟

طالب اخوانى said...

مستنيين الرد ...

ذكريات فى جامعة المنصورة

§a§a said...

هممممممممم وبعدين


هو كل ماتش اهلى وزمالك يا حج خطاب انت ودديو هتطلعولنا ببوست كدا
يلا خير

انا بمزح

Anonymous said...

للاسف الموضوع ده يكسف

انا كنت مروح بشترى حاجات من سنتر كده جنبنا وكلهم قاعدين مبلمين وفاتحين بؤهم على الماتش .. بعد ما مشيت مسافة طويلة .. الاهلى جاب جون .. الناس كانت بتصرخ وتصوت ولا كأن السقف هيقع عليهم .. او مثلا عرفوا انهم قبلوا فى وظيفة او ان حسنى مات .. مش عارف كل الصوت ده علشان جون للاهلى .. المهم انا اصلا اترعبت من شدة الصوت .. وفكرنى الصوت ده بايام المظاهرات بتاعت الجامعة ... المهم وانا ماشى واحد من البلكونة فى الدور السادس او السابع وبيسقف وانا سامعه من تحت .. انتوا متخيلين قوة ايده ربنا يديله الصحة وميشوفش وحش .. وربنا يهدى

جارحى
elgarhy.blogspot.com

Dr_Moslim said...

تصدق بالله
انا كنت مروح البيت الساعة 115 وفجأة لقيت صوت عالي انا اتخضيت قلت البلد ولعت ولا ايه
بس افتكرت ان النهاردة مطش بيضحك عالدقون
فقلت اه
والله خيبة
العالم الاسلامي بيتبهدل واحنا بنشتم بعض ونتخانق علشان الكوة
ويجيلك شوبير يعيط في دريم
ويضربوا علي بعض نار
وياحرام ده بياخد 40 ألف بس أصل النادي ظلمه
واحنا الدكاترة بنشحت ((ربنا يسترها ))مش عارف أقولك ايه
انا كنت عملت موضوع علي شخابيط عن كده
http://shakhabeeet.blogspot.com/2007/05/blog-post_16.html
تخيل ياخي زمايلي بيطلعوا من الصلاة بيتكلموا في الكورة
تخيل لما واحد لما فريقه اتغلب حصلتله حالة في الطب كده اسمها FACIAL PALSY
نص وشه حصله شلل مؤت
لييييييييييييه كل ده
كل اللي أقدر أقوله
غنها هيااااااااااافة
واللي بيعمل كده يبقي .....أكمل بنفسك

salwa said...

موضوع الكورة واللي بيحصل ده ممكن يرفع عندي ضغط الدم وبعدها الله اعلمممكن يحصل ايه تاني

بكتفي فيه بلا تعليق

ربنا يهديهم من عنده

عمرو المصري said...

انت ليه محبكها ع الناس

مش مهم الناس اللي بتموت في العراق
مش مهم ان الفلسطينيين عليهم حصار والاكل بدا يخلص
مش مهم حال المسلمين اللي كل يوم من سئ لاسوا
مش مهم ان في نفس اللحظة اللي انت قاعد بتتفرج فيها ع الماتش في واحد زيك بالظبط واقف علي ثغر من ثغور الاسلام بيدافع عن دينه وارضه وبيدفع عنك خطر داهم


انا مش بحرم الفرجة ع الكورة
لكن لما تكون للتسلية
انما تكون غاية وهدف مش منطق للحياة ابدا


كلمة اخيرة لبلال فضل في الدستور

لو كنا فعلا ذاهبين ناحية الهاوية فلنذهب اليها واحنا غالبين الزمالك


مبروك عليك ياعم بلال الفوز في موقعة الزمالك ولتذهب الامة كلها للجحيم المهم هو هزيمة الزمالك


سلامي
من
ارض الحرب

هذه المرة سلامي ليس لك او لزوار المدونة

انما سلامي للمرابطين والمجاهدين في انحاء ارضنا

ارض الحرب

وائل_صح ولا غلط_ said...

متفق معك يا خطاب تماما في كل ماقلته

بسسسسسسسسسسسس

ايه المانع ان الواحد يشجع وميكونش متعصب ومن غير مايشتم ويسب ومن غير مايضيع وقته في الكلام ده

في قاعده اداريه بتقوووووووول

ماتقولش ده ولا ده

ولكن قول

ده وده

يعني انا لو واحد بأدي واجباتي الحياتيه والدعويه والعباديه

وحبيت ارفه عن نفسي بالشروط اللي احنا قولنا عليها دي ..اظن مافيش مانع ولاايه يا خطاب

النقطه التانيه دي بقي هي المشكله

اللي هي ان الشعب كله زي مانت قلت ملهيين في موضوع الكوره وواخدين الموضوع حياه او مووت وده طبعا
احد الادوات اللي بيستخدمها النظام لالهاء الشعب عن مايحدث في البلد وده طبعا كلنا ضده ولازم نغير من الناس
والتغيير ده هييجي من عندنا احنا
يعني انا شايف لازم نطلع بتوصيه عمليه من الموضوع ده ان احنا كل واحد يبدأ يكلم في النطاق اللي حواليه عن الموضوع سواء مع قرايبك او اصحابك او جيرانك

منة الله said...

و لم لا

لم لا تتركه يعيش مشاعر الانتماء

ان يشعر انه يواجه

ان يحيا مشاعر النصر و يخشى الهزيمة

يريد ان يحيا تلك المشاعر

فلمَ تمنعه

كان يحياها سابقا في مجراها الطبيعي

فاعتقلوه .. و قتلوه .. و حرموه حقه في الحياة

فلمَ تمنعه من هذا المتنفس ايضا

هل لديك بديل .. امن

هو يريده كذلك .. آمنا

Dr_Moslim said...

آسف للمقاطعة يا جماعة
بس بجد الموضوع صعب
تضييع وقت عالفاضي
وانا كنت لسه كاتب موضوع تاني عن كده
ياريت تشوفوه
http://analmoslim.blogspot.com/
وشكرا ليكم

بن توفيق said...

هقولكم ايه

كلامكم مظبوط ميه فى المية


ربنا يهدى

WhiSpeR said...

أنا بصراحة عجبني تعليق روعة
مصر ما بقيتش المكان الرائع للانتماء
الشعب بيشوف في بلده بلاوي
لدرجة إنه الانتماء للبلد اللي مورياه النجوم في عز الضهر دي بقى صعب أوي
الواحد نفسه ينتمي لحاجة تفرحه
حاجة ساعات بتنهزم وساعات بتنتصر
مش بلد على طول مهزومة
اللي بيحصل في الماتشات دي فعلا
نظام ناس بتفش غلها
مخنوقين ومكبوتين وما صدقوا لقوا حاجة تفرح
هاتولهم أي حاجة تفرح كويسة أو وحشة وهما يفرحوا
لكن انك تطالب شعب إنه يفضل ساكات ومكتئب لأنه مفيش حاجة تفرح
محدش بيستحمل كدة .
فبقوا بيطلعوا فرحتهم وتهليلهم وصراخهم وصوتهم
في أي حاجة تفرح أيا كان نوعها
وزي ما قالت روعة
لا يوجد بديل آمن
الناس عندها عيال عايزة تربيها
ونفسهم يعيشوا بأمان
والبديل الصحيح للكورة
غير آآآآآمن نهائييي
و هما شايفين قدامهم اللي بيحصل للي بيفتح بؤه
وشايفين السجون اللي ما بقيتش مستحملة الأعداد اللي فيها
مش مجرمين
لأ ... دي ناس كويسة حاولت تصلح
هل تعتقد إن الشعب دة نفسه يعيش هايف على طول ؟
مفيش شعب نفسه في كدة
أكيد في نسبة كدة
بس مش الشعب كله
الناس نفسها تعيش كويسة ومطمنة وكل حاجة
بس منين يا حسرة طول ما البلد كاتم على نفسها الطواغيت
الناس بس نفسها تطلع للشارع ويتجمعوا ويهيصوا
أيا كان السبب
فمابيصدقوا
هو دة كل تفسير اللي حصل
البلد حالها ما يسرش
والحل البديل صعب أوي
أكيد في ناس بتحاول
بس مش كل الناس تقدر ترمي نفسها في النار
في ناس كتييييييييير عايزة تعيش في أمان
من غير بهدلة
وسجون
أما عن التجاوزات اللي حصلت في الاحتفالات دي
فكل اللي أقدر أقوله
هو إن كل حاجة فيها كويس وفيها وحش
بس
وجزاكم الله خيرا

cleopatra said...

howa aked mafish mashakel fi el kora .. wala el volley .. wala el seba7a .. wala 7atta el bely

heia kol el moshkela el haiafaaaaaaa

en fe3lan iewsal el mawdoo3 eno asas 7ayatna fa dah marfood

we eno kaman iekon lih el awlaweia 3ala 7agat tania ketir .. zay el derasa masalan .. aw el din .. aw mawakef nakhoodha ded el zolm

fa dah kollo marfood

lazem ne2ool en el kora belzat keda fi el el 3alam .. masr .. italia .. england .. ecc

bas e7na el mafrood nekoon moslemin .. fa lama el kora tekon awlaweyetna 3ala 7esab she2oon el moslemin .. fa dih mosiba ..

barbie girl said...

دا بقى عادى فى مصر ومبقتش حاجة غريبة

يمكن تكون فعلا وسيلة للهو وتغيب العقل

وحكاية المرتبات المتناقضة دى فكرت فبها كتير ومش عارفة بردوا ليه اللاعبين والممثلين هم اغنى ناس فى مصر فى حين اى موظف بيكون مطحون وبياخد ملاليم فى الاخر
بس موصلتش لاجابة

عصفور المدينة said...

الترويح عن القلوب الذي يتكلمون عنه المفروض أن يصب في الهدف الحقيقي للحياة
عبادة الله
أنا أروح عن نفسي أجلس مع أبنائي
أروح عن نفسي برياضة المشي وركوب الدراجة وخاصة وقت المباريات
اروح عن نفسي بمشاهدة الأفلام الوثائقية
أروح عن نفسي بقراءة المدونات
أروح عن نفسي بحل الألغاز الرياضية
أروح عن نفسي بتمارين البطن والضغط أروح عن نفسي بالسكون والهدوء
وليس بالصراخ والسباب والتحزب وإضاعة الوقت
لا تنس أيضا ما يضيع من وقت بعد المباريات في التحليل والتنظير والتندر على الآخرين المنهزمين في معركة الكورة
بل

والتدوين

جزاكما الله خيرا

Kad0o0ora said...

مش بحب اتفرج على مطشات الكورة

خطــاب said...



جارحى


فى كل حتة الصوات دا كان شغال


عمرو المصرى

بالضبط كدة
انت جبت الخلاصة
الكورة فعلا بقت غاية و هدف و انتماء !!

وائل

اهلا بيك
مفيش مانع طبعا
بس لو انت فعلا واخدها مجرد تسلية و تقضية وقت اكيد مش هتتنرفز ولا هتتعصب و لا تنط من الفرحة ولا تخش فى مناقشات و جدالات حول الماتش
صح ؟


ويسبر

اهلا بيكى
طيب كدة احنا متفقين ان الكرة بقت مش كرة
طيب هل بقى صح اننا نفضل على الوضع دا ؟
انا كنت كدة و يمكن اكتر
بس احنا كمسلمين عندنا قضايا اهم ننشغل بيها
مش معنى اننا نحط الكورة فى مقامها يبقى هنعيش فى اكتئاب
بالعكس الناس يمكن بتتنرفز من الكورة اكتر ما بتفرح
لو فى الغرب بيعملو كدة عشان الكورة معذورين لانهم كفرة دماغهم فاضية
انما احنا المفروض مسلمين شايلين رسالة
عندنا حاجات اهم بكتير نفرح بيها و حاجات اهم بكتير نزعل عليها
يبقى هل صح نفضل دافنين راسنا فى الرمل ؟؟


باربى جيرل


يبقى لا نعجب لضعف الاقتصاد المصرى
لما البلايين ضايعة على الكورة و الفن بدل ما تروح للصحراء و مراكز الابحاث
طبيعى نبقى دول عالم خامس



عصفور المدينة

سعيد جدا بتشريفك للمدونة
و اتمنى انى اشوفك دايما
و متفق مع كلامك تمام




نقطة مية said...

في جملة قالها الفنان محمد صبحي..و كل ما اشوف مشجعين كورة افتكرها...
قال"مصر عاملة زي التلميذ اللي سقط في كل حاجة و نجح في الالعاب فامه فرحت بيه ووزعت شربات على الشارع كله"!!!
و اللي بلاحظه ان الناس بيبقى عندها استعداد قوي للتجمع و تشجيع حاجة بتؤمن بيها ...
تحياتي

صاحب البوابــة said...

لا تعليق

غير ادعو الله ان نستيقظ قبل فوات الاوان

تحياتي

!!!

Neo said...

الحمد لله اني بنت

عشان كده اخويا مش راضي يوديني الاستاد طب كويس انكوا قلتوا عشان مش هقولله يوديني تاني

بس الحمد لله بردو عندنا مش بشوف كده خالص

يمكن عشان مش بيحصل او انا اللي مش بشوف الله اعلم

بس لو هو ده اللي بيحصل فدي قمة قمة التفاهة و قلة الادب كمان

Anonymous said...

لاتعاتبوا الناس علي اوقاتهم الفاضيه
فالكرة هي مايقضون اوقاتهم
اسف الفاضية والمليانة فيه0
العملية بسيطة اللي فاضي ومفيش في دماغه حاجة يقضيها متشة 0
اتمني يكون حد فهم قصدي0
اهو وقت وبيضيعوا0
عز

امام الجيل said...

هو فعلا ده تعبير لا شعورى من الناس من حالة القهر اللى عايشنها سواء داخليا او دوليا باحداث المسلمين فى كل مكان هو طبعا فيه ناس متعرفش فلسطين دى فين بس نقول ايه قدروا يلهوا الناس ويملوا دماغهم باى شئ غير الدين وغير هموهم الشخصية حتى

خطــاب said...



نقطة مية

الحقيقة تشبيه قوى جدا..الا انه ابتعد قليلا عن الحقيقة
اعتقد انه يمكن تشبيهنا كطفل ترك كل المواد و اهتم بالالعاب..و رسب فيها ايضا



عيلة و عايزة افهم said...

رد متأخر بس حسيت إني عايزة أكتبه

أقول لحضرتك على حاجة

وقت الماتش انا كنت في عمرة و كان معانا ناس قرايبي فيهم شباب
قبل ما نروح مكة بكام يوم كنا في المدينة مش عارفة كان فيه ماتش الأهلي و مش عارفة مين في قبل النهائي و طبعا تابعوا الماتش هناك
و بعدين لقيت واحد فيهم بيقول للتاني عارف يا فلان احنا مش حنعرف نشوف ماتش الاهلي و الزمالك عشان حيبقى يوم الاتنين
يوم الاتنين ده هو اليوم اللي احنا كنا نازلين فيه مكة عشان نعمل العمرة ... يعني الماتش حيبقى شغال و هما في العمرة

يوم الماتش رجعت من العمرة الحمد لله أنا و والدتي لقيتهم هما كمان رجعوا قبلنا و قاعدين متسمرين قدام التليفزيون عشان الشوط التاني كان قرب يخلص و كان الزمالك متقدم باين و كلهم قاعدين على أعصابهم بقى
بصراحة المنظر استفزني بس ما اتكلمتش
أصله مش طبيعي نكون في المكان ده في وقت زي ده و لسة عاملين عمرة و يبقى هو ده اهتمامهم وقتها
المهم انا كنت داخلة اجيب حاجة بسرعة من عند اخواتي اصلا و بعدين حاروح اوضتي انا و ماما مرة واحدة لقيتهم بيصوتوا و ياااااااااه و صوت عالي و دوشة عشان الاهلي جاب جون
بصراحة ساعتها ماقدرتش امسك اعصابي و قعدت اقول ايه اللي انتوا بتعملوه ده وطوا صوتكم و بطلوا كدة راعوا المكنا اللي انتوا فيه ...
راح واحد منهم قاللي كانت حتضيع ...
قلت له ما ضاعت فلسطين !!!

راح قاللي انتي بتوبخينا يعني و لا ايه
قلت له امال اوبخ مين ... أبو تركية ؟؟ ( مع احترامي لأبو تريكة بس هو الموقف اللي استدعى الكلام ده )

راحوا سكتوا ... و أنا كمان مشيت عشان كفاية حرقة دم على كدة ... رحت اوضتي و قعدت في السرير عشان أنام و كل كام دقيقة اسمع صويت جامد ... مش من اوضة قرايبنا ... لأ كان جاي من برة من الشارع ... يعني كان فيه مصريين تانيين كمان قاعدين برة في كذا مكان بيتفرجوا على الماتش ... و ماحدش بيفكر في سلوكه في مكان زي مكة المفروض يكون عامل ازاي و لا هو جاي هنا ليه أصلاً !!! حتى في مكة !!!
اتخنقت اوي يوميها و نمت و انا مكتئبة .....

معلش طولت عليكم ....

خطــاب said...

حاجة مؤسفة و الله

حتى فى العمرة

مش عارف ازاى اتعمل غسيل مخ بالشكل دا لينا !!!!

مريم said...

حكايه تاثير الكوره على مجتمعنا بقى ظاهر جدا
و لو حد شاف مسرحيه الشفره هيحس بكده جدا

قد ايه ان مجتمعنا بقى تافه جدا للاسف

و متعرفش هو متوجهين لكده و لا هم عايزين كده

ربنا يصلح احوالنا

بس للاسف "ان الله لا يغير ما بقوم حتى يغيروا ما بانفسهم"

و سورى على الرد المتاخر