Saturday, July 7, 2007

هنساكى للأبد


قسم لك....لن أنساك أبداً

وسأذكرك حينما تعود الطيور إلى عشها تطعم فراخها

سأتذكرك حينما تتعانق الأمواج الزرقاء مع الشاطئ الأبيض السحري
ِ سأتذكرك حينما تحتضن أشعة الشمس الدافئة الجزر المهجورة

سأتذكرك حينما أرى الفراشات ترتشف الرحيق من الزهرة البرية

سأتذكرك حينما أرى أزواج الطيور مهاجرة من الجنوب إلى الشمال

سأتذكرك في كل لحظة
.. لن أنساك أبداً

لقد نهش القدر من قلبي قطعة منه، لأنه أخذك عني بعيداً حيث لا أراك

لكنه لم يأخذ صورتك، بسماتك، همساتك مني، لأنه لا يقدر

القدر آلمني، لأنه أبكاني، لأنه حرمني، لكنه لن ينسيني صورتك في عيوني

لقد انتزع من كل شيء، حينما أخذك معه
سأتذكرك مع إشراقة شمس كل صباح... ومع غروبها في كل مساء..


وستيقي في مخيلتي في كل وقت وزمان..



سأتذكر الشجرة التى كانت تجمعنا سويا..

وكوب العصير الذى كنا نأخذ منه رشفات ب الشليموه
وكنا نطلب كوب واحد لسببين

لتوفير

ولكى نكون قلبين بشليموه واحد


وسأتذكر بائع الترمس الذى كاد ان يقتلنا عندما قمنا بسرقة الترمس منه.


وسأتذكر المبلغ الذى قمت بتسليفة لأبيكى لكى يسد دينه..
لن انساكى ابدا

وسأتذكرك

ولكن عندما احصل على المبلغ الذى اخذتية منى

سأنساكى للأبد


24 comments:

عمر الشرقاوى said...

الا الشعر دا عاطفى يا محمد ؟ انت كنت بتفسحها ولا بتعذبها ؟

المجاهدة said...

:D
ضحكتني اوى حكاية شاليموه واحد عشان التوفير
:lol:


ربنا يكرمك يا اخي
:)

بالله المستعان said...

ههههههههههه
دا انا كنت هصدقك خلاص

انت مش هتذكرها هي
انت هتذكر المبلغ اللي عليها
بس اوعي يكونوا 2جنيه وربع

جندى الدعوة said...

انا لو منك معرفهاش تانى

بس بصراحه عندك حق

خطــاب said...

ما شاء الله

عاطفى قوى الولد دا

شليموه واحد ههههههههه

منة الله said...

ههههههههههههههههههههه

و قلب و بتاع

اتاري الموضوع فلوس

بسمة said...

ههههههههههههههههههههه

خخخخخخخخخ

ايه ده

ليكونوا عشرة ساغ


لا والله يا محمد انا خايفة يبقوا عشرة ساغ


بس لو ادتك تسع قروش هتتذكرها ولا هتنساها

عصفور المدينة said...

اول ما قريت قلت مش سكتي مش حاعلق
أصلي مش باعلق على اي بوست كدة

بس لما وصلت عند الشاليموه قلت حلو ريقي جري
ولما وصلت للنهاية
:D

FloNa said...

ههههههههههههه

جامد اوي

في الاول التعبيرات حلوة اوي

بعدين شاليموه وترمس

وفي الاخر المبلغ اللي استلفتيه

ههههههههههههههه

Arabian GiRl(caaaaat) said...

:D

safa7_karmooz said...

لاء وهتنساها بعد متاخد الفلووس

راااااااااااااااااااااجل صوح ;D

Neo said...

انا اول ماقريته قلت خطاب اللي كاتبه بس لما شفت موضوع الشاليموه و الترمس و الفلوس قلت لأ محمد وطلع محمد

حلوة التريقة دي

و بالذات موضوع الشاليموة

:lol:

علاء said...

عصير و شالينوهشكلك بتكتب من الصحرا

بس جامدة جدا :)

Anonymous said...

شكلك واقع ياحمادة بس مخبي0
عز

elbostagy2 said...

السلام عليكم ورحمة الله وبركاته

ربنا يكرمك
استطعت أن ترسم البسمة على شفاهي للحظات

ربنا يرجعلك ال 3 جنيه إلا ربع اللي علي أبوها


ياريت تشارك في الحمله دي

غزة لن تجوع ولن تركع

yasmine Bashaar said...

حلوة اوى

mo'men mohamed said...

ههههههههه
الا قولى
انتم سرقتوا الترمس منين
عشان برده لو معايا حته ولا حاجة نروح نتسول هناك

جزاك الله كل خير
السلام عليكم

بن توفيق said...

ايه يا عم الكلام الكبير ده

ده انت بتحب من ورانا بقى

لأ وايه بالشاليموه .. مش هتنساها وهتنساها

لا ده كلام كبير عايز قعده بقى يا محمد

belal said...

طب بعد ما الفلوس ترجع
اللي علق عل الموضوع هينوله من الحب الفلوس _جانب_

شروق الشمس said...

كنت بحسب حضرتك بتتكلم على واحد صاحبك في الجامعة.. واتخرجتوا

طلعت واحدة وكمان عليها فلوس

أضحك الله سنك

بحب الحق said...

ماشاء الله

شكل الموضوع كبير

حلوة اووووووى حكاية الشاليموه دى

تحيتى لحرفك

ibnyosry said...

ايه ياباشا الكلام الكبير

ده
فكها ياعم شويه
متبقاش بخيل

نقطة مية said...

يا سلااااام...و صابر عليها كل ده عشان الفلوس...شفت بتحبها قد ايه و الله هي الخسرانة..ده كفاية انك كنت بتنشل معاها ترمس و بتشربها العصير يالشاليمو..
ده حب 2007

مريم said...

انا بجد كنت خلاص مصدقه
بس جامده بجد جدااا
ههههههههههههه

و حكايه الشاليموه ده جامد كمان

و الترمس اللى اتسرق

و السؤال صح هو المبلغ كان كام