Tuesday, November 13, 2007

سوق العمل فى اشهر

اليوم اتكلم عن فترة من حياتى و هى الفترة ما بين التخرج و الحصول على الاعفاء من الخدمة العسكرية
قولولى مبروك
:D


هتكلم عن خبراتى مع سوق العمل فى الفترة دى لسببين :
1- ربما دا يضيف لخبرات الناس حاجة ولو قليلة
2- عشان عايز ارتب افكارى

بسم الله نبدأ :

1- اسلام اون لاين

فى فترة الامتحانات كنت شفت اعلان على موقع عشرينات
job vacancy
المهم لقيت انهم عايزين واحد يمسك منتدى .. طبعا انا اهتميت جدا لانى راشق على النت منذ ردح من الزمن
ظبطت السى فى على اساس الوظيفة دى
بمعنى انى كتبت فيه خبراتى على النت و كتبت انى عندى بلوج و الكلام دا
المهم بعد ما خلصت الامتحانات بشوية لقيتهم بيكلمونى و اكتشفت انهم موقع اسلام اونلاين القسم الانجلش
الراجل قالى تعالى بكرة اعمل تست
رحت عملت التست على الكمبيوتر كان بالانجلش و فيه اسألة عامة و اسألة مواقف و غيره .. كان امتحان شديد يعنى
المهم الراجل قالى لو نجحت فى التست دا هنكلمك تيجى تعمل انترفيو فى خلال اسبوع كدة
طبعا عدى اسبوع اسبوعين تلاتة .. انا قلت انا كدة سقطت .. بعدها فوجئت انه اتصل
انا كنت عايز اقوله انت لسة فاكر
المهم رحت وواثق من نفسى جدا و رحت قعدت مستنى .. شوية و راحو مدخلنى مكتب لقيت 3 قاعدين .. راجل شكله افريقى او امريكى و بنتين .. البنتين شكلهم جداد فى الاتش ار و كان شكلهم قلقانين زيى .. الراجل بقى كان جامد
طبعا الانترفيو انجلش و انا مرة واحد نسيت الانجلش .. عكيت عك محترم يعنى
لا و كمان نزل عليا غباء مغولى لما الراجل قالى شايف نفسك فين بعد سنة ؟؟ قلتله فى الجيش :D
يالا ما علينا .. هو لما عرف انى عندى جيش راح معلم على السى فى
طبعا عرفت انى كدة سقطت و متصلوش بعدها .. بس بصراحة كان اصعب انترفيو عدى عليا لان الراجل كان بيسأل فى تفاصيل دقيقة جدا بالانجلش يعنى موقفى من النصارى و حاجات كدة فى وقت الانجلش بتاعى كان فى التليين .

2- ريكروتمنت ايجبت

دى شركة ريكروتمنت يعنى توظيف كانت نزلت اعلان فى الاهرام و بعتلها
المهم كنت فى كلية طب بقابل ناس صحابى كانو مخلصين امتحانات لقيت واحدة بتكلمنى بالانجلش
فرديت عليها بالعربى راحت قالتلى :
sorry u're supposed to talk i english
قلت اوكى و ماله .. هى اسمها بولين و مش مصرية اصلا
طبعا كنت فى الشارع و سامع بالعافية .. زهقتها منى مش سامعها خالص
المهم قالتلى انها هتبعتلى التفاصيل على الميل و ان الشغل فى موبينيل و الانترفيو بكرة قلتلها بتحصل :D
روحت بقى لقيت باعتنلى ميل فيه عنوان الشركة .. فى المقطم !!! يااااه دانا عمرى مارحته ولا عايز اروحه
و العنوان اصلا باعتينه فى عريضة كأنى رايح القمر مثلا
بس بصراحة كانت وصفة جامدة وفرت عليا السؤال ..و فى واحد صحبى كان سبقنى بكام ساعة فظبطتنى برضه
المهم رحت هناك دخلت لقيت جروب قاعد .. نزلو علينا بامتحان انجلش متخلف و امتحان اى كيو عينك متشوف الا النور
غالبا محدش نجح فيه .. المهم
خلصت انا و اتنين تانيين فى نفس الوقت فدخلونا مكتب كدة ..و جه واحد رحب بينا و بتاع
هو الشغل كان كاستمر سيرفس فى موبينيل .. فالراجل قعد يبص فى السى فى و يسأل كل واحد سؤالين هبل كدة
باباك بيشتغل ايه تاريخ ميلادك كام .. حاجات كدة
فهمت انه كان بيشوف الاكسنت بتاعة كل واحد فى الانجلش اللهجة يعنى
فجه على الانتين التانيين قلهم انتو متنفعوش عشان الانجلش بتاعكو
جالى انا قالى الانجلش بتاعك كويس بس المشكلة عندك فى الجيش...خييييير
بس انا مزعلتش لانى مقاليش انى الانجلش بتاعى مينفعش .. و دى موبينيل يعنى

هووووف تعبت .. هكمل بعدين ان شاء الله
الحلقة الجاية بقى ..
السرااااااااااية :D


6 comments:

Anonymous said...

:d



كان الله في العون

Omar Elgarhy said...

السراية

واااااه من السراية

سراية صفرا !!

Anonymous said...

بلاش فضايح يا ريس



دي اعراض ناس


:D

عصفور المدينة said...

أعانك الله يا أستاذ

ومبروك الإعفاء واعتبر إن أمامك سنة كان زمانك مقضيها جيش تدور فيها براحتك وترفع مهاراتك وتكتب خبراتك
:)

Nermien Hani said...

ههههههه شايف نفسك بعد سنة فين؟ في الجيش

يا عيني الموضوع كان مأثر فيك اوي كده؟

كنت قلتلي كنت كتبتلك على موقويات مقاومة للغباء

يلا خير خيرها في غيرها

مبروووووووووووووووك الاعفاء

الفاتح اليعقوبي said...

ربنا يعينك ياعم خطاب والف مبروك علي التاجيل وربنا يعينك
والسلام