Wednesday, August 1, 2007

It's all about house music


كنت ارسلت مقالة صغيرة ساخرة لجريدة الدستور و اتنشرت بس فى اجزاء حذفت منها , المقالة اهى..و هعلم الاجزاء الى حذفت بالاحمر



المقهى و الكافيه..ربما يقومان على نفس الفكرة الا ان الفارق بينهما يظهر جليا من خلال مستوى الرقى او بالعامية "النضافة", فشتان الفارق بين مقهى بلدى و كافيه ك"سيلنترو" مثلا .. فإن قدر لك و دخلته يوما تطالعك اول ما تطالعك فاترينات بها انواع من المأكولات و المشروبات ربما لم ترها من قبل و بالطبع لا تجرؤ على السؤال عن كنهها او سعرها. لا تلبث طويلا حتى تكتشف انه امامك خيارين:

smoking zone التوجه الى ال
non-smoking zone التوجه الى ال

تتخذ قرارك طبقا لمدى حبك للدخان, تنتظر ال"ويتر" ليحصل على طلبك بعدما امضيت بضع دقائق فى مطالعة اسماء المشروبات العجيبة..و بما انك تحب المغامرة فانك تطلب الموكا و لا مشاكل بشأن ال 12 جنيه ثمنها. تأمل على خلق الله من حولك..هناك على اليمين عدد من رجال الاعمال يبرمون صفقة مليونية و كان الكافيه افضل مكان لذلك فى وجهة نظرهم, و على يسارك شاب اوروبى يحدق فى شاشة جهاز اللاب توب الخاص به فقط لتكتشف تقنية الواى فاى او الانترنت بلا اسلاك. فإن نظرت امامك فلابد ان تقع عينك على شلة من الشباب و البنات الكووووول او الهاى كلاس, يبحثون و يناقشون احدث البومات عمرو و فرق الهيفى ميتال.
.
"it's all about house music"
هكذا يهتف احدهم فى حكمة شاعرا بأنه قد توصل لاكتشاف مذهل
بمناسبة الميوزك..هل تسمع تلك الاغنية تتردد من نظام الساوند سيستم المتطور ؟ "كلمة واحدة و كلمتين حلوة يا بلدى..غنوة واحدة و غنويتن قمرة يا بلدى" انها المرة الخامسة منذ جلست..قد تتعجب من اصرارهم على هذه الاغنية بالذات رغم ردائة الكلمات والالحان, و لكنك لا تفقه شيئا فى الاغانى يا صديقى..
it's all about house music كما اتفقنا..
تتذكر انك سمعت ان المغنية امرأة يهودية..هل لهذه المعلومة اهمية ؟ دعك من هذا و ادفع الحساب و لا تفكر ابدا بمنح الويتر "تيبس" فالمبلغ الذى تظنه محترما قد يدفعه هو لمنحك تيبس..هل ابقيت شيئا للعودة للمنزل ؟ جميل تخرج شاعرا بأنه كان حلما جميلا..ربما لن تفيق منه الا مع قرع قطع الدومينو و الطاولة فى قهوة الفيشاوى التى تقضى فيها سهرتك اليومية حتى منتصف الليل. هل تفكر فى زيارة الكافيه مرة اخرى ؟ هذا قرار حكيم ولكن فلتؤجلها لاول الشهر المقبل يوم قبض المرتب..و لتبدأ رحلة مسلية مع البحث عن معنى كلمة ال
house music




مش عارف؟؟ رغم ان الموضوع ملوش لزمة و مش مقالة ذات قيمة بس مش ظريف انه يتم التعديل على كلامك و نشره بدون موافقتك

16 comments:

my24434 said...

مش عارف هما عملوا ليه كده بصراحة


بس يمكن قصدهم انه ما يبقاش في اعلان لسيلانتروا او كده


يعني ما يبقاش دعاية ليه


الله اعلم

saiaf said...

السلام عليكم
بالنسبة للمقال ..فهو يصف حالة واقعية فعلا. و يناقش حاجة موجودة فى المجتمع المصرى بالاخص ( اللى بيحب المناظر الخادعة )

اما بالنسبة لموضوع المقال و نشره ناقص
فطبعا ديه عادة الصحافة فى بلدنا

طبعا الصحافة فى البلد لا تتمتع بأى حرية حتى فى الصحف الخاصة

طبعا كل ده لانك أكيد فى مصر

FloNa said...

مقالة كويسة اوي

بس برضه اعدت ابص على العبارات المحذوفة ملقتش فيها حاجة

بتهيألي ممكن اغنية بلدي على اساس انها اغنية للبلد وبتاع لازم منمسهاش

وصفقات المليون وبتاع مش عارفة ليه حذفوها !!


بس فعلا الكافيهات دي بجد مشكلة

الفكرة اني لما بدخل كوستا او سيلنتروا مثلا بحس ان مصر كلها اغنياء !!

يارب وامال فين الشعب الفقير بقى اذا كان كل دول معاهم فلوس يدفعوا !! :)

امنية said...

سلام عليكم
مقال واقعى جدا
لما بدخل سيلنترو او كوستا او ما شابه بحس انى بلد غير مصر
او يمكن دى مصر وانا اللى غريبه!

بالنسبة للحذف اعتقد انها محاولة لتقليل حجم المقال فقط ولا قصد من الحذف سوى ذلك
على العموم الفكره وصلت حتى بعد الحذف
:)

عصفور المدينة said...

أولا المقال جميل ويظهر العوجة التي يعيشها الشباب
وثانيا الحذف فظيع في أماكن غريبة بس مبرر يعني أنا وصلت تقريبا لكل كلمة حذفت لسبب واحد على الأقل
وثالثا اعتقد مجهود التلوين ده ارهقك جدا

حراس الحقيقة said...

ممكن يكون اللى اتشال اتشال عشان مساحة الكلام فى الجريدة والله اعلم

بن توفيق said...

انا مش هتكلم عن المقال
انا هتكلم على الحته التاينة اللى هى حذف من المقال

اظن ان ده بقت لسف طبيعة فى كل شىء فى مصر

انت تعمل اللى انت عايزة .. وانا انشر اللى انا عايزة

معلش يا حبى .. تتعوض مرة تانية

cleopatra said...

ولا انا عارفه حذفو الجمل ديه ليه .. اكيد غاية في نفسهم وهما بس اللي يعرفوها

بس مقالة حلوة اوي .. وفعلا الكافيهات في مصر .. اسعارها بالذات اغرب ما يكون مشوفتش زيها في اي مكان ..

اليعقوبي said...

عدنا عدنا عدنا
عدنا عدنا عدنا
عدنا عدنا عدنا

ملك said...

مقال جميل

بالتوفيق

امام الجيل said...

ليك تاج عندى ارجو التكرم بقبوله
تحياتى

عمرو فكرى said...

عشان الدعاية طبعا يابو خطاب


لا صحيح يا زعيم اخبار المانيجر معاك ايه؟ :D

بحب الحرية said...

مقال جمبل ..ونظرية واقعيه كتير

سلمت يداك أخ خطاب

Anonymous said...

maqaal 7elww .. we fe3ln a3taked enno homma shallo elgomal lelmesa7aa msh aktr!

shady Ahamed Mosa said...

يعنى اية هو هدف المقال ..اى مكان فى الدنيا بيبقا فية اصناف مختلفة من الناس سواء سلنترو او اى كافية فى الدنيا ..اى مكان احنا بنقعد فية او بنسكن فية او حتى بنمر علية مرور الكرام بيضم ناس مختلفة من حيث كل حاجة ومش متشابهة فى حاجات كتير زى بعض ..
المقالة ملهاش اى معنى خالص..ياريت نحاول نفكر فى جديد ..الفرق بين الكافية والقهوة مش فكرة مقالة ذات معنى او تهم اى حد انا واحد من الناس بقعد على سلنترو وبقعد على القهوة

وعلى فكرة اللى فى الصورة دة سلنترو سيتى ستارز

Maha said...

ما شاء الله .. اسلوب التدوينة عجبني

وفعلا غريب إنهم يحرروا المقال كده من نفسهم