لن ننسالك يا علاء

بداية

السلام عليكم ورحمة الله وبركاتة

اولا انا مش هطول

ده بس يعتبر اعلان عن برنامج

ان شاء الله فى برنامج هيذاع على قناه modern tv ان شاء الله

تردد القناه 10758

القناه اغانى انا اتمنى اننا نفتحها بحرص وياريت منتفرجش عليها

نفتحها وقت البرنامج بس

بالله عليكم

البرنامج اسمة بداية للداعية عصام حمدى

هيذاع من الساعة 10 للساعة 11

الرنامج هيتكلم عن اخلاقيات الرسول صلى الله علية وسلم

ياجماعة عوزين نفعل البرنامج ده عشان القناه مش كويسة ولو نجح البرنامج هيستمر بعد رمضان

فهيكون فى مكان للدعوة فيه كبير اوى

يا جماعة بجد لازم نتفرج على البرنامج الناس تعبت فيه اوى

وكمان

وايه الفقى صاحبة مدونة فلسطينية الهوى .. مصرية الارض

طبعا كان فى ناس تانيين بس هما مرضوش يقولوا على اسمهم

وفى النهاية . الفقير الى الله

محمد اللى هو انا

ده موقع القناه فيها منتدى جوة

وكمان فى ساحتين اسمهم

موعدنا الجنة واسلاميات

عوزين نضغط على الساحتين دول

ونحاول نكلم ناس ونعرفهم الطريق الصح

يلا يا جماعة الدعوة الى الله جت لحد عندكم

؟؟؟؟؟؟؟ها هتعملوا ايه

هتوحشنى يا علاء

فعلا الواحد مبيحسش بحد الا لما يفتقده ..

بقبله كتير وبتكلم معاه وبنضحك ولما بكون زعلان بشوفه همى كله يتشال ..

مش عارف نفسى الايام ترجع تانى عشان بس اشوفه نفسى

والله انا فعلا ندمان على كل ساعة او ثانية عدت من غير متكلم معاه او منفضلش على طول مع بعض ..

علاء محترم اوى وجميل اوى وفعلا عمرى مشوفت حد بجماله

ولا بقمة ذوقه كانت الضحكة بتخرج منه على القلب على طول

مينفعش منضحكش لازم نضحك علاء ده حاجة ميوصفهاش حد ومهما اتكلمنا مش هنعرف نوفى جماله ..

فى مرة كنت زعلان من حاجة فى الكلية وكنت مخنوق اوى ..

والله اول مشوفت علاء جى نحيتى ضحكت بطريقته اللى معودنا عليها اتشال كل الهموم اللى جوايا ..

حسيت انى مش زعلان خالص ..

يااااااااااااه يا علاء بجد انا اسف اسف اوى انى مشبعتش منك

والله انا بندم بندم اوى انى فعلا مشبعتش منك صح ..اه لو ترجع الايام تانى يا علاء والله مش هسيبك خالص

يارب بجد بجد يا رب وسع قبرة واجعله روضه من رياض الجنة

.. يارب لا تحرمنا من رؤيته فى الاخرة واجمعنى معه عند الحوض يا ارحم الراحمين

يارب اغفرله وارحمه وارضى عنه ..

يارب انك عفو كريم تحب العفو فعفو عنه

يارب والله انه عبدك وجاهد فى سبيلك وتمنى الشهادة لوجهك فأرضى عنه وتقبلها يا ارحم الراحمين

يامن رحمتك وسعت كل شئ

يارب لا تغفر له ذنبه بدعوتى ولا بعمله اغفرها برحمتك يا ارحم الراحمين

والله انى احبه فيك فأدخله جنتك وحشرنى معه ومع رسولك الكريم

سلام يا علاء

سلام يا اجمل انسان فى الدنيا

دمعت العيون والقلوب لفراقك يا اعز الناس

والله انى احبك فى الله

علاء

بلغنى خبر وفاة احد زملائنا فى الكلية و اسمه علاء جبة

لما قريت الخبر على مدونة محمد عبد العاطى مكنتش عارف هو مين
بس لما شفت صوره عرفته
يمكن مكنش بينا تعامل بس كنت بشوفه كتير عند المسجد بتاع الكلية



توفاه الله قبل رمضان بايام قليلة..يمكن دا بيدى احساس بقيمة الدعاء الى بنردده كتير: اللهم بلغنا رمضان
علاء كان موصى واحد عنده فى بلده انه يتختمله القران يوم عرسه
و فعلا انهاردة اتختمله القران مرتين
الناس هناك كانت مصرة انه عرسه .. لانه مات -نحسبه- شهيد
لانه مات غريقا
علاء كان بيكلم واحد صاحبه مش فاكر مين دايما عن الشهادة
عايزين نموت شهداء
يا رب اقبله شهيدا و الحقنا به
انهاردة برضه زى ما واحد صحبى راح العزاء حكالى كان المسجد متقفل على اخره و الناس فرشت برة المسجد كمان فى صلاة الظهر و صلاة الجنازة .. و المسجد كان ضخم مش صغير
و مع ان بلده تعتبر بعيدة الى حد ما "البدرشين" بس الناس راحتله بعدد كبير قوى
لما صاحبى حكالى على التفاصيل دى فكرت
يوم ما اموت هل هاموت شهيد ؟ ولا زيى زى اى حد
يوم ما اموت كام واحد هيصلى عليا و هيمشى فى جنازتى
يا ترى حد هيبكى عليا ؟
حد هيهتم اصلا ؟ ولا مجرد خبر زى اى خبر
مش عارف

اوسطه مغفـــرة

هتكلم ان شاء الله عن رمضان فى شكل خواطر بما انه كلها ايام و الشهر الكريم يبدأ
بس اولا بعتذر عن عدم الكتابة لمدة تقارب الشهر .. يمكن فى بعض الاحيان كنت بحس ان الكلام كله اتقال
كلام كلام كلام كلام
كله مكرر
و فى بعض احيان قلت انا هدفى من المدونة دى اظهار الحقيقة المختبئة بفعل التعتيم الاعلامى و غسيل المخ الى بنتعرض له كمسلمين فى العصر الحالى .. بس الناس عارفة الكلام دا كله
و الناس الى مش عارفة مش بتدخل المدونة اساسا
دى كلها افكار لسة فى دماغى و فعلا بتولد احباط ملوش حدود
بس ان شاء الله هستمر..على الاقل هكتب الكلام دا .. لنفسى

رمضان

1
انا فاكر من عدة اعوام كنت بضايق لما رمضان ييجى
ييييه هنصوم بقى و نموت من الجوع .. مش عارف الناس فرحانه بيه ليه
هو بس اجمد حاجة فيه البرامج الجامدة زى الكاميرا الخفية و غيرها
لحد ما ربنا كرم و الواحد عرف قيمة الشهر دا
2
من الحاجات الجامدة فى رمضان سلسلة الشياطين
كدة خلصنا من احد اعدائنا .. بس لسة باقى عدوين
النفس و شياطين الانس
يمكن سلسلة الشياطين بتعمل شغل فعلا و الواحد بيبقى قريب من ربنا و حالته الايمانية مرتفعة
بس الاتنين الى قلت عليهم برضه ما بيتوصوش
3
دلوقتى احنا مستنيين رمضان بفارغ الصبر .. قرفانين من الذنوب والمعاصى و مستنيين الشهر الى اوله رحمة و اوسطه مغفرة و اخره عتق من النار
بنجهز جداولنا فى رمضان
صيام ايمانا و احتسابا ؟ صدقة ؟ حسن خلق ؟ قران ؟ قيام ؟ تهجد ؟
كلام جميل
4
شياطين الانس يسكتوا ؟
لا ازاى
تلاقى بقى الجماعة اياهم نازلين بما لذ و طاب فى التليفزيون
مسلسلات رمضان - فوازير - برامج رمضان- افلام- الخيمة الرمضانية حيث الشيشة !
انا مش فاهم يعنى ايه علاقة دا كله برمضان ؟
هو تقريبا عايزين يعوضوا غياب شياطين الجن
هجمة اعلامية شرسة و قذرة




5
من المظاهر الرمضانية فى بلدنا الحبيب برضه الحجاب الرمضانى
يعنى دخل رمضان حط الحجاب خلص رمضان شيل الحجاب
و طبيعى ان اغلب الى بيعملو كدة بيبقوا من العينة دى
عامة دا نموذج الحجاب المنتشر ف رمضان و غيره
و دا البوست الى كتبته ضمن الحملة بتاعة الحجاب
الواحد بيفكر يعد فى البيت فى رمضان ( عملتها رمضان قبل الماضى)
6
رمضان فرصة ذهبية برضه للتغيير
ناس كتير ربنا بيكرمها بالالتزام فى رمضان بالتحديد
بيبقى وقت مناسب جدا للانطلاقة الاولى
ربنا يكرم و يثبتنا على الايمان

7
دى مواقف متفرقة من الى بنشوفها فى رمضان

اخيرا ادعولى يا جماعة كتير
عندى جيش ادعولى اخد اعفاء او تاأجيل